FDCH halo anunsia kona-bá rezultadu programa bolsa hakbiit liuhosi konferénsia imprensa iha salaun MESSK, tersa (13/07/2021). Imajen Tatoli/Francisco Sony

DILI, 13 jullu 2021 (TATOLI) – Diretora Ezekutiva Fundus Dezenvolvimentu Kapitál Umanu (FDCH), Leila Cárceres dos Santos,  anunsia ona rezultadu avaliasaun bolsa hakbiit bá benefisiáriu 410 asesu bá Instituisaun Ensinu Superiór Privadu (IESP).

Notísia Relevante : FDCH ho IESPP-sira asina MoU apoia bolsa hakbiit ba benefisiáriu 910

Leila Cárceres dos Santos relata katak inskrisaun bá programa bolsa hakbiit ne’ebé hala’o iha munisípiu hotu, inklui RAEOA, ekipa Sekretariadu FDCH no mós Ministériu Ensinu Superiór, Siénsia no Kultura (MESSK) simu dokumentu hamutuk  1.705 maibé kandidatu ne’ebé liu iha prosesu verifikasaun dokumentu ne’e hamutuk 1.500.

Nia esplika avaliasaun inklui selesaun no verifikasaun dokumentu konsege aprova ona kandidatu hamutuk 410 mak pasa. Kandidatu bolseiru sira-ne’e sei asesu bá Instituisaun Ensinu Superiór Privadu sira tanba antes ne’e estabelese ona memorandum entendimentu ho FDCH.

“ita nia benefisiáriu bolsa hakbiit 410 ne’e sei hala’o estudu iha área sira mak hanesan agrikultura edukasaun, enjeñaria, saúde no turizmu tuir IESP ne’ebé sira rasik deside,” Leila Cárceres dos Santos, hateten liuhosi  konferénsia imprensa ne’ebé hala’o iha salaun MESSK, Colmera, Dili, tersa ne’e.

Tuir nia katak naran bolseiru sira ne’e sei manda direita bá diretór ida-idak iha munisípiu atu públika iha kuadru avizu MEJD nian iha territóriu nasionál, inklui RAEOA. Nune’e mós FDCH sei fó tempu bá kandidatu ne’ebé la pasa iha selesaun dokumentu ne’e atu halo reklamasaun hahú ohin to’o 28 jullu 2021.

Leila rasik afirma katak prosesu avaliasaun bá dokumentu sira-ne’e bazeia bá diploma Ministeriál númeru 9/2021, 10 marsu iha loron 25 fevereiru 2021 hodi fó biban bá sekretariadu FDCH forma ekipa tékniku kompostu hosi sekretariadu tékniku FDCH, MESSK, MEJD, MSSI iha munisípiu sira hodi halo inskrisaun bá programa bolsa hakbiit bá kandidatu bolseiru sira atu asesu bá Instituisaun Ensinu Superiór Privadu iha rai-laran.

Ekipa juri avaliasaun bá dokumentu ne’e kompostu hosi diretora ezekutiva FDCH nu’udar prezidente inklui membru haat mak hanesan Diretora Jerál Ensinu Superiór,  Koordenadora UKAE, Asesór Jurídiku MESSK no Koordenadór Gagesi hosi FDCH.

Diretora Jerál Ministériu Ensinu Superiór Siénsia (DJ-MESS) Maria Filomena Lay informa katak hosi prosesu verifikasaun dokumentu sira-ne’e komprova ona katak dadus ne’ebé deside ona bá bolseiru bolsa hakbiit 410 atu asesu bá IESP ne’e fiksu ona.

Jornalista : Tomé Amado

Editór       : Francisco Simões

 

HAKEREK NO HATÁN

Please enter your comment!
Please enter your name here