Estudante Sekundariu Jerál 04 setembru, UNAMET, Dili. Imajen Tatoli/Dok.

DILI, 12 jullu 2021 (TATOLI) –Família uma-kain haat (4) afetadu hosi inundasaun dezastre naturál, 04 abríl liubá to’o agora sei okupa hela sala aula rua  (2) iha eskola Ensinu Sekundáriu Jerál (ESJ) 04 setembru, UNAMET, Balide, Dili.

Notísia Relevante : Família uma-kain haat iha ESJ 04 setembru husu Governu apoiu uma

Diretór Eskola Ensinu Sekundáriu Jerál (ESJ) 04 setembru UNAMET, Balide, Sergio da Cruz  hateten, sira-nia parte preokupa tanba tempu atu re-ativa eskola besik daudaun ona, maibé aula eskola rua ne’e sei okupa hosi família uma-kain haat.

Bá Agência Tatoli iha nia servisu fatin, segunda ne’e, Sergio da Cruz, antes ne’e reprezentante Sekretáriu Estadu Protesaun Sivíl (SEPS) promete sei arranja fatin bá família uma-kain haat ne’e, maibé to’o agora laiha informasaun. Tan ne’e parte eskola hein hela sira-nia intervensaun molok eskola iha Dili hahú re-ativa filafali.

Hatán ba preokupasaun ne’e,  reprezentante SEPS, Antoninho Viegas informa katak durante ne’e nia esforsu maka’as kona-bá família uma-kain haat ne’e ninia destinu atu bá ne’ebé, maibé agora nia esforsu filafali atu ko’alia ho Diretór Jerál atu haree to’o desizaun ruma kona-bá família uma-kain haat ne’e ninia destinu.

“Ha’u sei ko’alia tan ho DJ atu diskute tan fali asuntu ne’e molok eskola re-ativa eskola iha Dili laran,” nia tenik.

Teresa Batista Martins ho ninia família na’in-neen ne’ebé okupa hela sala aula iha eskola 04 setembru UNAMET ne’e husu bá Governu atu haree kondisaun ne’ebé sira enfrenta. Tanba falta tan semana ida resin Ministériu Edukasaun sei re-ativa ona eskola.

“Ami uma-kain haat sei okupa hela sala aula rua tanba kondisaun uma grave totál. Antes ne’e SEPS rasik mak rekomenda ami kontinua okupa lai sala rua iha eskola 04 setembru UNAMET hodi hein desizaun Governu nian atu muda sira bá fatin foun. Maibé fulan rua ona ami hein hela seidauk iha informasaun ida” nia tenik.

Komunidade suku Mascarinhas aldeia 01 ne’e akresenta katak, durante fulan rua hela iha eskola ne’e, sira la hetan ona apoiu hosi Governu. Maibé sira hetan de’it apoiu fasilidade fatin atu asegura an hosi udan no loron-manas. Maibé tempu to’o ona eskola atu hahú nia husu SEPS nia promesa ne’e tenke realiza.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here