Primeiru-Ministru, Taur Matan Ruak hamutuk ho entidade relevante observa direta fatin estragu tanba dezastre naturál, tersa (06/04) Imajen TATOLI/Egas Cristóvão

DILI, 11 juñu 2021 (TATOLI)-Vítima Dezastre Naturál uma-kain haat (4), hosi Aldeia 01, Suku Mascarinhas, Postu Administrativu Vera Crus, Munisípiu Dili, ne’ebé daudaun ne’e kontinua hela iha eskola Ensinu Sekundária Jerál (ESJ) 04 setembru, UNAMET, Balide, Dili, husu Governu fó apoiu uma ba sira.

Notísia Relevante : SEPS husu atu uma-kain haat hela lai iha eskola 04 setembru

Vítima dezastre naturál Tereza Baptista Martins hateten, Governu autoriza sira kontinua hela iha ESJ 04 setembru di’ak ona, maibé kondisaun fatin mak la seguru tanba toba de’it iha rai hodi fó impaktu ba ema-nia saúde, liuliu inan balu ne’ebé ho kondisaun gravida no balu foin partu.

“Ami agradese ba Governu tanba daudaun ne’e sei oferese ESJ 04 setembru ami hela, maibé ida ami labele hela kleur tanba situasaun ne’ebé ami enfrenta mak toba de’it iha rai maske ami iha kolxaun maibé ida ne’e la tahan tanba mihis, tanba ne’e husu ba Governu atu halo netik uma ba ami,” Tereza Baptista Martins hateten lia-hirak ne’e ba Agência Tatoli iha Eskola 04 setembru, Balide, Dili, sesta ne’e.

Nia hatutan, daudaun ne’e sira sei kontinua hela iha eskola 04 setembru tanba dezastre naturál, 04 abríl liubá, halo rai monu taka sira-nia uma no agora uma fatin atu hadi’a ba hela fali mós ladi’ak.

“Ami-nia maluk uma-kain 52 foin lalais sira fila, ami deside kontinua hela, entaun Sektretáriu Estadu Protesaun Sivíl mai ko’alia ho dirijente Eskola atu autoriza ami hela lai, maibé situasaun ami hasoru agora ne’e sente ladi’ak ba ami-nia saúde,” nia hateten.

Nia firma, kona-bá hahán, bee-moos, saneamentu, laiha difikuldade tanba hela iha eskola no Governu mós ba apoiu hahán, hanesan foos, mina no supermi, maibé parte seluk sira-nia difikuldade mak fatin no ropa tanba momentu inundasaun sira balu halai ho ropa tahan iha isin-lolon de’it.

Iha sorin seluk Administradór Postu Administrativu Vera Crus, Munisípiu Dili, Octavio Viera do Amaral, ba Agência Tatoli liuhosi telefónika hateten,  esforsu ne’ebé durante ne’e sira halo ba vítima dezastre naturál mak sira fó formatu dezastre naturál nian ne’ebé haruka hosi Governu liuhosi hosi Ministériu Administrasaun Estatál fó ba vítima sira prienxe, atu hetan apoiu uma ne’e entrega ona ba Governu iha hela prosesu nia-laran.

Nia husu ba vítima-sira liuliu vítima uma-kain haat ne’ebé daudaun ne’e sei kontinua hela iha eskola 04 setembru, pasiénsia uitoan tanba Governu agora esforsu hela, tanba planu atu harii uma ba bairru foun ne’e sei halo iha Hera no Tibar.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here