Pesoál aviasaun hatún hela ai-moruk vasina AstraZeneca hosi aviaun ne’ebé Governu Austrália oferese, iha aeroportu internasionál Nicolau Lobato, Comoro (30/06/21). Imajen Tatoli/António Gonçalves.

DILI, 12 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 39, rekoperadu  32 no kazu ativu 909.

“Kazu foun 39 ne’e mai hosi Dili 25 no munisípiu-sira 14, kompostu hosi mane 27 no feto 12,’’ Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, segunda ne’e.

Notísia relevante:COVID-19: pozitivu 57, rekuperadu 61 no ativu 902

Hosi totál kazu detetadu foun ohin, ho idade 12 mai karaik  na’in-ida, entre tinan 12-59 na’in 35 (89,7%), idade 60 mai karaik nain-tolu, no  7,6% sintomátiku.

Kumulativu kazu konfirmadu sura hosi 21 marsu 2020 to’o 12 jullu 2021 hamutuk 9.862. Hosi horisehik mai ohin, teste ne’ebé Laboratóriu Nasionál Saúde halo hamutuk 383 PCR, ho detallu hanesan tuir-mai, Vijilánsia sentinela laiha, rastreiu ba kontaktu ka Contact tracing 36, Rastreiu Aleatóriu  ka Random Screening 24, Viájen sai-hosi serka sanitária hosi Dili 204, Viájen internasionál 39, Follow up iha kuarentena na’n 80.

Totál testes PCR ne’ebé halo horisehik 11 jullu iha Munisípiu-sira seluk, RAEOA no HNGV hamutuk 388 ho detalla hanesan tuir-mai, Maubisse 19, Maliana ualu, Viqueque 10, Suai 15, Baucau 77, Ermera laiha, RAEOA laiha no HNGV 259.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 12  Jullu tuir sistema informasaun Sáude iha Ministériu Saúde  Total  kumulativu 1ª doze iha Dili 117.302(54,9%). Totál  kumulativu 2ª doze  iha Dili 21.862 (10,2%).

Ema ne’ebé simu ona vasina doze dahuluk iha Timor-Leste 231.145 (30,6%), ema ne’ebé simu ona doze daruak  34.053 (4,5%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 3,8/100 mil abitante, enkuantu ba de’it munisípiu Díli 9,6/100 mil abitante.

Insidénsia iha leten sei nafatin hatudu katak, Munisípiu Dili mak fatin ho risku bo’ot liu atu populasaun hetan da’et no hada’et tutan virus SARS-CoV-2.

Informasaun hosi izolamentu

Iha 12 jullu 2021, izolamentu Vera Cruz halo tratamentu ba kazu detetadu na’in 15, Iha área obstetrisia na’in-rua no iha medisina interna na’in 11, iha sirurjia na’in-rua. Iha obstetrisia na’in-rua kategoria leve (mild) hotu.

Iha área medisina interna na’in 11. Ida grave, uza oksijéniu na’in-haat, moderadu na’in-neen leve mild. Sira na’in-rua iha sirurjia kategoria leve mild hotu.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Husu ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here