Evolusaun surtu COVID-19 iha Timor-Leste hosi loron 21 marsu 2020 to’o 11 jullu 2021. Imajen/CIGC

DILI, 11 jullu 2021 (TATOLI)–Sala Situasaun, Sentru Integradu Jestaun Krize (CICG, sigla portugés) iha domingu ne’e relata evolusaun COVID-19 iha rai laran, ne’ebé rejista kazu pozitivu hamutuk 57, rekuperadu 61 no kazu ativu atuál ne’ebé baixa hela iha sentru izolamentu hamutuk 902.

“Kazu detetadu foun ohin, kompostu hosi Dili 30 no munisípiu seluk 27, mane 37 no feto 20,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, informa liuhosi nota ne’ebé Agência TATOLI asesu, domingu ne’e.

Hosi totál kazu pozitivu ohin, ema ho idade 12 mai karaik na’in-rua, idade 12-59 na’in-53 (92,9%),  no idade 60 ba leten na’in-rua, no hosi kazu hirak ne’e 5,2% de’it mak sintomátiku (hatudu sintoma), maibé maioria asintomátiku (laiha sintoma).

Nune’e, kazu konfirmadu ne’ebé rejista hahú 21 marsu 2020 to’o ohin loron hamutuk 9.823.

Hosi horseik to’o ohin, teste Polymerase Chain Reaction (PCR) iha Dili ne’ebé Laboratóriu Nasionál Saúde halo hamutuk 453, kompostu hosi vijilánsia sentinela tolu, rastreiu ba kontaktu 14, rastreiu aleatóriu 44, viajen sai hosi Serka Sanitária Dili 340, viajen internasionál 42, no follow up iha kuarentena hamutuk 10.

Enkuantu teste PCR ne’ebé realiza horiseik iha munisípiu sira, Rejiaun Administrativa Espesiál Oé-cusse Ambeno (RAEOA) no Hospital Nacional Guido Valadares (HNGV) hamutuk 196, kompostu hosi Baucau 96, Ermera 25, Maliana 0, Maubisse 35, RAEOA rua, Suai sia, Viqueqeu hitu, no HNGV rua.

Ema 32.804 iha territóriu tomak simu ona vasina doze daruak

Tuir sistema informasaun saúde iha Ministériu Saúde, totál doze vasina ne’ebé fó ona ba populasaun elijível tinan 18 ba leten, to’o ohin dadeer tuku 10:00, ema ne’ebé simu ona vasina doze dahuluk iha Timor-Leste hamutuk 230.914 (30,6%) no simu ona doze daruak hamutuk 32.804 (4,35%),

Enkuantu, totál kumulativu ema ne’ebé simu ona doze dahuluk iha Dili hamutuk 111.113 (54,8%) no totál kumulativu doze daruak 20.613 (9,64%).

Aleinde ne’e, indikadór ne’ebé matenek-na’in epidemiologia sira uza atu hatene surtu ninia evolusaun aumenta ka diminui maka insidénsia.

Konvensionalmente, insidénsia sukat totál kazu foun kada loron pur abitante 1.000 no hatudu risku ne’ebé populasaun iha atu hetan da’et moras ida. No hosi inséndia COVID-19 iha Timor-Leste, durante loron hitu ikus maka abitante 3,8/100.000, enkuantu ba de’it iha munisípiu Díli hamutuk abitante 9,6/100.000.

“Insidénsía iha leten sei nafatin hatudu katak munisípiu Dili maka fatin ho risku boot atu populasaun hetan da’et no hada’et tutan virus SARS-CoV-2,” Koordenadór CIGC subliña.

Izolamentu Vera Cruz

Iha loron 11 jullu 2021, izolamentu Vera Cruz halo tratamentu ba kazu detetadu 16, iha área obstetrisia na’in-tolu, iha medisina interna na’in-11, no iha sirurjia na’in-rua.

Enkuantu, iha obstetrisia na’in-tolu kategoria leve hotu no hosi sira na’in-11 iha medisina interna, na’in-rua grave uza oksijéniu, na’in-tolu moderadu, no na’in-neen leve, sira na’in-rua iha sirurjia, kategoria leve hotu.

Númeru kazu moderadu no grave ne’ebé baixa iha Vera Cruz, hatudu katak bainhira ema barak liu detetadu pozitivu, maka barak liután maka sei baixa ho kategoria moderadu no grave.

Ho nune’e, Ministériu Saúde, liuhosi Sala Situasaun CIGC apela ba populasaun tomak, atu nafatin respeita regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e hanesan, uza máskara, fase liman beibeik ho sabaun ka uza dezinfetante ruma, no evita kose lima ba matan, inus ho ibun, bainhira kumprimenta malu la presiza kaer liman, bensa-liman, rei-malu ka hakuak-malu, no evita halibur-malu barak, hamrik ka tuur dook hosi ema seluk mínimu metru ida ho balun.

Jornalista : Nelia Fernandes

Editora     : Julia Chatarina

HAKEREK NO HATÁN

Please enter your comment!
Please enter your name here