Sentru Juventude Viqueque. Imajen Tatoli/Vitorino Lopes da Costa.

VIQUEQUE, 09 jullu 2021 (TATOLI)—Sentru Joventude Munisípiu Viqueque, ezekuta ona 40% hosi fundu  transferénsia públika ne’ebé maihosi Sekretária Estadu Joventude no Desportu (SEJD), ho montante $26.583.

“Ami-nia ezekusaun la’o tuir nafatin padraun ezekusaun 2021, tanba ami hetan apoiu orsamentu ho tipu rua. Primeiru maka, osan operasionál $26.583 no tipu programa $59.220 ho totál fundu $85.803 hosi   SEJD.  Ami foin ezekuta osan operasional 40% ba atividade-sira,” Diretór Sentru Joventude Munisípiu Viqueque, Luis Sarmento, hateten ba jornalista Agência Tatoli, iha Viqueque, sesta ne’e.

Notísia relevante:PAA 2022, Viqueque sei propoin harii Ospitál Referál

Durante periúdu COVID-19, buat barak tenke paradu tanba labele halibur ema barak, liuliu iha implementasaun Programa-sira.

Programa ne’ebé Sentru Joventude Viqueque  implementa ona mak hanesan, kursu lian Portugés, Inglés, komputadór.

Alende ne’e, planu emprendorizmu sosiál ne’ebé sei implementa iha postu administrativu lima mak hanesan Lacluta, Ossu, Viqueque Villa, Uatulari ho  programa sira seluk liga ho dezenvolvimentu talentu joventude.

Jestór operasionál  Sentru Joventude Viqueque, Juvinál da Costa, informa kona-bá programa emprendorizmu sosiál, sei iha koordenasaun  ho adiministradór-sira atu bele implementa iha suku-sira.

Nia dehan, fundu ba programa ne’e hamutuk $59.220 ne’ebé balun prevee ona ba programa emprendorizmu sosiál hamutuk $33.000 hodi apoia grupu joventude ne’ebé kada grupu sei hetan $600.

Tarjetu alvu ba grupu Joventude maka postu Viqueque Villa suku 10 ne’ebé iha grupu 15 ho alokasaun orsamentu $9.000,   postu administrativu Ossu iha suku 10 ne’ebé iha grupu 15 ho alokasaun orsamentu hamutuk $9.000.

Postu administrativu Uatulari iha suku neen ho alokasaun orsamentu $6.000, postu administrativu Uatucarbau iha suku neen, ho alokasaun orsamentu $6.000 no postu administrativu Lacluta iha suku haat ho alokasaun orsamentu $3.000.

Oras-ne’e daudaun, nível desizaun políltika sei depende ba nasionál liuliu Sekretária Estadu Joventude no Desportu (SEJD), no implementasaun SEJD destaka ona ofisiál  iha munisípiu atu koordena ho parte autoridade munisipál.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here