Reuniaun hodi diskute PAA 2022, iha salaun Administrasaun Viqueque. Imajen Tatoli/ Vitorino Lopes da Costa.

VIQUEQUE, 08 jullu 2021 (TATOLI)—Autoridade Munisipiu Viqueque sei propoin atu estabelese Ospitál referral iha munisípiu ne’e, iha Planu Asaun Anuál (PAA) 2022.

Adiministradór Munisípiu Viqueque, Januário Soares ‘Bolly’ hateten parte autoridade konvoka ona reuniaun hodi hahú diskute kona-bá PAA 2022 hamutuk ho diretór, xefe departamentu no adininistradór postu-sira, iha salaun administrasaun munisípiu Viqueque, kinta ne’e.

Notísia relevante:OJE 2021, Viqueque ezekuta ona 23%

“PAA 2022, Viqueque fó prioridade ba setór saúde, hodi harii Ospitál referál ida, atu nune’e populasaun lalika refere ba Baucau,” Januario Soares ‘Bolly’ hateten ba jornalista Agência Tatoli, hafoin reuniaun.

Nia dehan, bainhira PAA ne’e mak konsege realiza duni, sei hafásil populasaun atu bele konsulta besik, no sei husu ba Ministériu Saúde atu dezloka médiku espesialista-sira iha Viqueque.

Rezultadu hosi reuniaun ne’e parte administrasaun distribui ona tabela proposta ba dirijente-sira hanesan diretór saúde, agrikultura, edukasaun, administradór postu-sira atu bele prienxe proposta kona-bá montante orsamentu nain.

Kona-bá kalkulasun orsamentu ba tinan 2022 seidauk iha desizaun finál tanba foin mak distribui tabela proposta PAA 2022.

Iha fatin hanesn Diretór Serbisu Saúde Munisípiu Viqueque,  Francisco de Carvalho, konsidera planu harii Ospitál referál ne’e importante tanba durante ne’e pasiente grave tenke dezloka ba Ospitál Referál Baucau.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here