Kondisaun estrada suku balun iha teritóriu nasionál ne'ebé at tebetebes. Imajen/foti hosi Facebook.

BOBONARO, 09 jullu 2021 (TATOLI)—Populasaun iha suku Aiasa, postu administrativu Bobonaro, munisípiu Bobonaro, seidauk asesu estrada no eletrisidade.

Xefe suku Aiasa, Juvenál Moniz Marques preokupa tanba tempu udan populasaun iha suku ne’e susar atu lori produtu lokál ba merkadu.

Notísia relevante:2021, suku tolu iha Bobonaro sei asesu eletrisidade

“Populasaun iha suku ne’e la asesu estrada iha tempu naruk. Dalan iha, maibé tempu udan komunidade sempre halerik tanba tahu dodok no labele transporta produtu ba merkadu,” Juvenál Moniz Marques, hateten ba jornalista Agência Tatoli, via telefónika, sesta ne’e.

Autoridade lokál foti ona inisiativa, hodi organiza populasaun aterru estrada, nune’e bele fasilita transportasaun produtu lokál ba merkadu.

Jeografikamente suku Aiasa iha rai bokur no malirin, motiva tebes populasaun atu kuda hare, modo, lakeru, liis, fehuk, talas, ai-farina, maibé distánsia ba merkadu Bobonaro villa kuaze kilómetru ualu.

Aldeia tolu ne’ebé seidauk asesu eletrisidade mak hanesan aldeia Aiasa, Mazop ho Odelgomo, no aldeia Ualgomo, Aiasa ho Aisalgusun mak asesu ona.

Suku Aiasa iha aldeia neen ho totál populasaun hamutuk 2.772 mai hosi xefe família 624.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here