Liña distribuisaun enerjia elétrika. Imajen Tatoli/António Gonçalves.

BOBONARO, 07 jullu 2021 (TATOLI)—Eletrisidade Timor Leste, Empreza Públika (EDTL, E.P), planeia ona atu fornese enerjia elétrika ba suku tolu iha munisípiu Bobonaro, iha 2021.

Komisáriu ba Asuntu Tékniku, EDTL,E.P, Latino Jeronimo, promete katak tinan ne’e sei hahú projetu fornesimentu enerjia elétrika iha suku Saburai postu adminiztrativu Maliana, suku Atabae postu administrativu Atabae no suku Guda postu administrativu Loloto’e.

Notísia relevante:PNDS implementa ona projetu 180 iha Bobonaro

“Suku tolu ne’e tama iha prioridade ba projetu ne’e bazeia ba levantamentu dadus ne’ebé tékniku-sira fornese ba diresaun jerál eletrsidade anteriór, kontinua dezenvolve no konsege tama iha pakote. Maibé, projetu ne’e sei hahú  implementa iha setembru tamba tékniku-sira sei halo levantamentu dadus ba suku balun,” Latino Jeronimo , hateten ba jornalista Agência Tatoli, iha administrasaun munisipál, Holsa Maliana, kuarta ne’e.

EDTL, E.P sei halo mudansa ba dadus ne’e, bainhira projetu ne’e hetan impedimentu hosi entidade no grupu balun, tanba ne’e nia husu ba autoridade lokál-sira atu fasilita informasaun ba parte hotu-hotu, nune’e iha faze implementasaun laiha impedimentu.

Iha fatin hanesan, Prezidente Autoridade Munisípiu Bobonaro, Ernesto da Silva, husu entidade hotu-hotu liu-liu veteranu-sira, labele hanoin atu impede projetu ne’e, tanba povu hela iha nakukun laran durante tinan barak.

“Ha’u sei haruka funsionáriu-sira kontrola iha terrenu, hodi evita mosu impedimentu hosi veteranu-sira tanba ita-nia munisípiu presija kontribuisaun entidade hotu,” Ernesto da Silva subliña.

Xefe suku Saburai, Vicente dos Santos, agaradese ba Governu no promete sei asegura serbisu bainhira projetu ne’e hahú, tanba populasaun iha suku ne’e presija duni noroman hanesan mós suku-sira seluk.

Populasaun ne’ebé sei hetan fornesimentu liña eletrisidade iha tinan ne’e, suku Atabae iha uma-ka’ain 222, hosi aldeia Fatubesi no Madebau, suku Guda postu administrativu Loloto’e iha aldeia haat mak hanesan Joilpo, Oceli, Guda-Taz no Anon ho opulasaun 1.241.

Suku Saburai ho populasaun 2.796 hosi família 711 iha aldeia Tas-masak, Kosal no Mabiloa.

Jornalista: Sèrgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here