ETDA atribui sertifikadu ba formandu hamutuk na’in-81 hosi Hera no Metinaro. Imajen Tatoli/Nelia Fernandes.

DILI, 09 jullu 2021 (TATOLI)—East Timor Development Agency (ETDA), sesta ne’e hala’o serimónia entrega sertifikadu ba formandu hamutuk na’in-81 hosi Hera no Metinaro iha área turístika, ospitalidade bázika, joias (perhiasan) no lian inglés.

Diretór ETDA, Januário Neto Mok, informa formasaun ne’e loloos finaliza iha fulan-juñu maibé  foin hahú fali iha loron 16 to’o 20 juñu tanba serka sanitaria no konfinamentu obrigatóriu.

Notísia Relevante: ETDA reativa formasaun ba juventude 80 hosi Hera-Metinaro

“Formasaun ne’e apoia hosi UNDP, koopera ho projetu eko turizmu iha Hera no Metinaro. Estudante sira-ne’e prepara-aan ba serbisu hamutuk ho ezisténsia eko turizmu iha Hera no Metinaro. Hosi juventude na’in 81 ne’ebé simu sertifikadu hosi ETDA ne’e kompostu hosi feto na’in-50 no mane na’in-31,” Januário Neto Mok, informa ba Agência TATOLI, iha nia kna’ar-fatin.

Nia husu estudante sira tenke prátika ne’ebé iha atu-bele dezenvolve iha sira-nia suku hamutuk lideransa komunitrária sira.

Iha sorin seluk, formandu hosi Postu Administrativu Metinaro ne’ebé estuda iha área ospitalidade, Maria Manuela Castro, sente kontente ho opurtunidade ne’ebé oferese hosi ETDA.

“Ami tuir formasaun iha ETDA durante semana rua nia laran. Hosi formasaun ne’e, ami aprende buat barak. Metinaro ne’e besik tasi-ibun entaun ami mós presiza halo netik buat ruma iha-ne’ebá kona-ba te’in nian. Durante formasaun aprende kona-ba te’in, halo modo nomós halo dose ho modelu oioin,” nia dehan.

Nune’e mós formandu iha área turístika, Agostinho Natalino de Jesus Soares, agradese ba ETDA no UNDP ne’ebé apoia formasaun hodi dezenvolve área turizmu nian.

“Ami sei aplika iha terrenu hodi bele dezenvolve iha área turizmu tanba ami koñese didi’ak área mangrove, ne’ebé mak poténsia boot tebes iha Metinaro,” nia dehan.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here