Estudante Eskola Sekundária Tekniku Vokasionál Teknolojia Industrial Becora Antes Tama Eskola Fase Liman hodi Prevensaun Surtu COVID-19, Dili. Imajen/Egas Cristovao

DILI, 08 jullu 2021 (TATOLI) – Ministériu Edukasaun, Juventude no Desportu (MEJD) deside ona data fiksu bá prosesu ensinu aprendizajen prejensiál sei hahú iha loron 19 jullu, tinan ne’e.

Notísia Relevante : Ministru Armindo Sei Re-ativa Eskola Fazeadamente

Ministru Edukasaun, Juventude no Desportu (MEJD), Armindo Maia, fó nafatin orientasaun bá ekipa servisu Edukasaun Munisípiu Dili, atu kontinua servisu iha semana rua nia laran ho maka’as, tanba Ministériu Edukasaun iha ona kompromisu atu re-ativa eskola iha Dili hahú segunda (19/07).

“Ami halo reuniaun hamutuk ho Edukasaun  Munisípiu Dili,  kuarta (07/07), ha’u fó orientasaun ne’ebé klaru bá sira atu pro-ativu liután hodi husu bá eskola sira iha Dili atu prepara an iha semana rua nia laran hodi re-ativa ensinu aprendizajen prejensiál,” Ministru Armindo Maia, informa ba jornalista sira iha Ministériu Edukasaun, Vila Verde, Dili, kinta ne’e.

Nia esplika katak enkontru daruak sei hahú fali iha loron 14 jullu, atu haree preparasaun saida mak eskola-sira iha Dili halo ona. Tanba dadus ne’ebé Ministériu Edukasaun simu hosi Servisu Edukasaun Munisípiu Dili purvolta eskola 76 mak preparadu ona atu re-ativa eskola.

Iha fatin la hanesan, Diretór Eskola Sekundáriu Tékniku Vokasionál (ESTV) Hera, Francisco da Costa Fernandes, afirma sira iha totál profesór 31, ne’ebé na’in-20 simu ona vasina no na’in-11 seidauk vasina. Maibé nia esforsa atu profesór-sira bele simu hotu vasina molok atu re-ativa eskola iha segunda oin mai.

Diretór Francisco akresenta katak profesór 11 seidauk simu vasinasaun inklui profesora inan-isin rua no inan fó susu na’in rua,  profesór na’i-tolu  moras komplikadu no profesór na’in-neen tanba ta’uk seidauk vasina.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here