Logotipu Kopa FFTL 2020. Imajen/FFTL

DILI, 09 jullu 2021 (TATOLI) – Liga Futeból Timor-Leste (LFTL) no Federasaun Futeból Timor-Leste (FFTL) pronunsia ona atu klube primeira divizaun ho segundu divizaun tenke hahú rejistu ona iha loron 12 jullu to’o 12 agostu 2021.

Notísia Relevante : Kalendáriu kopa FFTL aprovadu, agostu abertura jogu

“Fatin rejistu no verifikasaun ba klube sira sei hala’o iha edifísiu FFTL durante oras servisu, kalendáriu ba jogu sira sei hahú iha agostu agora,” Diretór Relasaun Públiku LFTL, Diogo Neto, hateten liuhosi konferénsia imprensa iha edifísiu FFTL, Dili, sesta ne’e.

Sorteiu ba klube sira hodi dada ba jogu kopa FFTL, LFTL no Tasa 12 de Novembru, sei hala’o iha 14 agostu. Enkuantu, jogu primeiru ne’ebé hala’o mak kopa FFTL lao kedan ho liga no ikus Tasa 12 de Novembru, sei partisipa hosi Primeira Divizaun no Segunda Divizaun ne’ebé hamahan an iha LFTL.

Iha fatin hanesan Adjuntu Sekretáriu Jerál FFTL, Frederico Martins hateten, kona-ba protokolu saúde FFTL koordena ona ho Sentru Integradu Jestaun Krize (SIJK) oinsá atu hala’o jogu tolu ne’ebé termina ona.

“Ami submete ona karta balun ba SIJK, ne’ebé sira iha ona koñesimentu ba ita atu hala’o jogu sira ne’e, regulamentu mak jogu hala’o laiha adeptu, maibé ita sei haree lai regra Governu nian se ema hotu vasina 80% ba leten ona bele iha maibé tenke kumpre nafatin regra sira,” nia hateten.

 “Segunda agora ami mós sei hala’o enkontru ho administrasaun klube sira, oinsá ho osan subsídiu atu haforsa klube sira hodi hala’o jogu. Primeiru Divizaun sei hetan $20.000 no Segundu Divizaun $10.000, subsídiu ne’e realize hanesan akordu ne’ebé FFTL, LFTL no Governu halo ona subsídiu ba klube mai hotu hosi FFTL,” Frederico konfirma.

Klube sira hamahan an iha Primeira Divizaun mak hanesan, AD. SLB Laulara, Karketu Dili FC, Boavista FC Timor, Assalam FC, Aitana FC, DIT FC no AS Ponta Leste.

Segundu Divizaun mak hanesan, Sporting Clubo de Timor, Nagardjo FC, Atletico Ultramar, Academica FC, Zebra FC, Kablaki FC, Lika-Lika Lemorai FC, AS Marca, Emanuel FC, Santa Cruz FC no FIEL FC.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here