Logotipu TDD. Imajen Tatoli/Dok.

DILI, 08 jullu 2021 (TATOLI)—Tribunál Distritál Dili (TDD), liuhosi primeiru interrogatóriu, aplika Termu Identidade Rezidénsia (TIR) ba arguidu ho inisiál DGM no medida koasaun Aprezentasaun Periódika ba arguidu ASS, nu’udár eis funsionáriu hosi ministériu balun.

“Despasu Tribunál haree aplika medida koasaun rua ne’e adekuadu,”Advogadu Privadu, Januário Martins, hateten ba jornalista iha TDD, kinta ne’e.

Notísia relevante:Estensaun EE la prezudika atividade TDD

Ministériu Públiku (MP) promove hodi husu Tribunál atu hili medida koasaun, aplika ba arguido-sira atu kautela sujeita ba prosesu investigasaun ne’ebé sei la’o hela.

Nune’e, arguidu ne’ebé hetan TIR bainhira saihosi rezidénsia atuál iha Dili tenke fó hatene ba autoridade seguransa, no arguidu ne’ebé hetan aprezentasaun períodika sei aprezenta-an kada fulan dala ida.

Kona-bá faktu hosi kazu ne’e, nia dehan seida’uk bele adianta tanba sei iha segredu justisa, hodi hein prosesu julgamentu normál bainhira parte MP finaliza ninia investigasaun atu aprezenta ba Tribunál.

Arguidu kumpre ona detensaun iha sela polísia durante oras 72, hodi kontinua submete primeiru interrogatóriu.

Enkunatu, Polísia Serbisu Investigasaun Kriminák Nasionál (PSIKN), iha segunda 06/06/21 ezekuta mandadu detensaun TDD, hodi kaptura no detein arguidu ASS iha aldeia halibur, suku Motael, postu administrativu Vera Cruz no arguidu DGM ho voluntária entrega-an ba iha edifísiu PSIKN, Caicoli, kontinua ba prosesu investigasaun.

Arguidu ASS deskonfia komete krime partisipasaun ekonomia no negósiu previstu iha artigu 299 kódigu penál no DGM deskonfia komete krime administrasaun danoza previstu iha artigu 271 kódigu penál, bainhira hala’o hela kna’ar iha ministériu balun iha tinan hirak liu-bá.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here