Juiz Administradór Tribunal Distritál Dili (TDD), Afonso Carmona. Imajen/Dok. Tatoli

DILI, 02 jullu 2021 (TATOLI)—Estensaun Estadu Emerjénsia (EE) ba dala XVI, sei la prezudika atividade iha Tribunál Distritál Dili (TDD).

Juiz Administradór TDD, Afonso Carmona, hateten julgamentu kontinua la’o maibé kumpri regra prevensaun COVID-19 hanesan uza m’askra, distánsia fíziku, fase liman ka uza dezinfektante ruma.

Notísia relevante:TDD sei reativa julgamentu movel

“Ita kontinua hala’o atividade normál tanba hakarak termina prosesu kazu pendente hotu-hotu iha tinan ne’e,’’ Afonso Carmona, hateten ba jornalista Agência Tatoli iha knaar fatin, Mandarin, sesta ne’e.

Durante EE, bainhira parte sira ne’ebé envolve iha prosesu julgamentu hanesan arguido no sasin ne’ebé pertense ba área Ermera no Liquiça mak la marka perezensa, Tribunál la fó kulpa tanba kumpreende situasaun, importante mak iha koordenasaun bainhira la disponível.

Iha fatin hanesan, Maria Santos prontu koopera maski nia mai-hosi Ermera mak mai Dili hodi partisipa iha julgamentu tuir notifikasaun ne’ebé simu ona.

Tuir dadus hosi TDD, to’o fulan maiu tinan ne’e, iha kazu krime hamutuk 1.637 no sivíl 864 mak sei pendente.

Jornalista: Nelson de Sousa

Editór: Cipriano Colo