Administradór munisípiu Viqueque, Januário Soares ‘Bolly’. Imajen Tatoli/ Vitorino Lopes da Costa.

VIQUEQUE, 06 jullu (TATOLI)—Autoridade Munisipál Viqueque ezekuta ona Orsamentu Jerál Estadu (OJE) 2021, Quarter primeiru (Q1) iha fulan marsu hamutuk 23%, hosi montante millaun $5 ne’ebé prevee ba munisípiu ne’e.

“Ha’u simu pose iha fulan janeiru, no sei presija tempu atu hadi’a estrutura. Pratikamente ezekusaun OJE 2021 to’o fulan marsu iha atinjimentu 23%,” Administradór munisípiu Viqueque, Januário Soares ‘Bolly’ hateten ba jornalista Agência Tatoli, iha adiministrasaun munisípiu Viqueque, tersa ne’e.

Notísia relevante:Janeiru-juñu SERVE,I.P Viqueque rekolla $707,50

Administradór ne’e hatutan, alokasaun OJE 2021 ba munisípiu Viqueque hamutuk millaun $5,  autoridade munisípiu define ba setór agrikultura, saúde no edukasaun no agora daudaun fokuliu ba prevensaun COVID-19 ne’ebé espalla iha munisípiu ne’e.

Nia rekoñese katak, setór edukasaun provizoriamente paradu tanba autoridade konsentra hela hodi luta kontra pademia COVID-19, no mós parte agrikultura mós komesa la’o daudaun ona iha terrenu.

Tanba ne’e nia husu ba populasaun atu kontribui ba prevensaun COVID-19, nune’e bele ultrapasa situasaun ne’e atu bele ezekuta hotu OJE 2021, hodi prepara hikas planu 2022.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here