Ministru Edukasaun Juventude no Desportu, Armindo Maia no Embaixadór Nova Zelandia iha Timor-Leste, Philip Hewitt asina nota entendimentu kona-ba HANDS 2. Vila verde, kinta (08/07). Imajen Tatoli/Egas Cristovão

DILI, 08 jullu 2021 (TATOLI) – Ministru Edukasaun Juventude no Desportu (MEJD), Armindo Maia ho Embaixadór Nova Zelándia mai Timor-Leste, Philip Hewitt, kinta ne’e,  estabelese akordu parseria atu kontinua implementa programa HANDS II hodi dezenvolve edukasaun pre-eskolár iha territóriu nasionál hahú 2021 to’o 2026.

Programa HANDS II bá edukasaun pre-eskolár ne’e atu dezenvolve labarik sira-nia kapasidade atu bele halimar, aprende no deskobre susesu. Programa ne’e kontinuasaun hosi HANDS I ne’ebé hala’o ona iha 2015 no remata iha 2020.

Ministru Edukasaun Juventude no Desportu (MEJD), Armindo Maia relata katak ema barak hanoin edukasaun pre-eskolár ne’e la importante.  Maibé bainhira haree didi’ak edukasaun pre-eskolár ne’e mak sai fundasaun bá edukasaun hotu iha mundu.

Nia akresenta dezde inísiu bainhira Governu Nova Zelándia hakarak hadi’a edukasaun pre-eskolár iha Timor-Leste,  MEJD prontu apoiu programa ne’e hodi bele dezenvolve labarik Timoroan sira atu prepara bá futuru.

“Ita-nia kondisaun edukasaun pre-eskolár iha territóriu nasionál hamosu dezafiu boot bá labarik sira iha munisípiu. Dala-barak, labarik sira tenke lao ain kuaze kilómetru lima (5) atu hetan matenek. Labarik sira hakarak bá eskola maibé kondisaun mak la permite,” Ministru Armindo Maia hateten iha nia breve palavra iha serimónia asina kooperasaun ho Embaixada Nova Zelándia iha salaun enkontru MEJD, Vila Verde, Dili.

Ministru Armindo Maia lori Ministériu Edukasaun nia naran agradese ba Governu Nova Zelándia tanba konkretiza ona programa ne’e hamutuk ho MEJD hodi prepara labarik nia abilidade iha futuru.

Embaixadór Nova Zelándia mai Timor-Leste, Philip Hewitt konsidera programa HANDS hanesan investimentu boot Governu Nova Zelandi nian no ida-nee priviléjiu boot ida atu hasa’e kapasidade no abilidade labarik sira-nian iha edukasaun pre-eskolár.

“Ami sente priviléjiu boot tanba bele kontinua programa HANDS II ne’e hodi hasa’e kapasidade no koñesimentu estudante pre-eskolár sira iha Timor-Leste. Ha’u hein ita bele servisu hamutuk hodi hadi’a kualidade edukasaun iha TL,” nia tenik.

Nova Zelándia hakarak tau atensaun bá programa HANDS II ne’e maibé importante liu maka ema hotu tenke identifika planu  ho didi’ak atu bele ezekuta.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here