Komunidade suku Manleuana, postu adminisrativu Dom Aleixo, troka voucher ho produtu Cesta Bázika iha supermerkadu Leader, tersa (09/02). Imajen TATOLI/António Gonçalves

DILI,  07 Jullu 2021 (TATOLI)–Ministériu Finansa (MF) realiza pagamentu Cesta Bázika faze daruak ho montante millaun $13,6 ba kompañia fornesedór hamutuk 53, ne’ebé selebra ona kontratu ho ministériu implementadór.

“Pagamentu hirak ne’e realiza hafoin Ministériu Finansa simu pedidu pagamentu hosi Ministériu Turizmu, Komérsiu no Indústria (MTKI) hamutuk 67, nune’e realiza ona pagamentu 53, enkuantu pedidu 14 tenke devolve ba ministériu responsável atu kompleta rekezitu pagamentu tuir lei haruka hodi submete filafali ba Ministériu FInansa,” refere nota ne’ebé Agência TATOLI asesu, kuarta ne’e.

Nune’e, hosi fulan-marsu to’o inísiu jullu 2021, MF realiza ona pagamentu Cesta Bázika (faze I no II) hamutuk millaun $41,2.

Kompañia fornesedór sira (100%) kumpre devér hodi selu impostu rendimentu 0,5% hosi totál pagamentu ba Autoridade Tributária no MF ho totál kontribuisaun impostu hamutuk $206.400.

Inisiativa kompañia lokál kumpre devér ne’e, fó implikasaun ba taxa ezekusaun Governu, liuliu iha parte ezekusaun reseita doméstika ne’ebé to’o iha loron 30 juñu 2021, atinje ona millaun $77,3 reprezenta 41% hosi totál estimativa reseita millaun $187,1.

Foin lalais ne’e, MF aprova ona Commitment Payment Voucher (CPV) foun Cesta Bázika hamutuk 108, kompostu hosi MTKI iha CPV 67 ho montante millaun $21,3, Sekretaria Estadu Kooperativa (SEKoop) iha CPV 17 ho montante millaun $7,9 no Ministériu Agrikultura no Peska (MAP) iha CPV 24 ho montante millaun $2,9.

Notísia relevante: MF kria CPV foun Cesta Bázika ho valór millaun $32,2

CPV foun hirak ne’e haruka filafali ona ba ministériu implementadór sira hodi hahú prosesu aprovizionamentu interna no sei submete filafali mai MF hodi halo verifikasaun molok realiza pagamentu.

MF liuhosi Sekretariadu Tékniku Fundu COVID-19, kontinua serbisu hamutuk ho ministériu implementadór sira atu konklui pagamentu Cesta Bázika ba kompaña lokál sira ne’ebé mak fornese ona ai-han ba komunidade sira.

Bazeia ba relatóriu husi Ministériu Koordenadór Asuntu Ekonómiku (MKAE), to’o iha loron 14 juñu 2021, benefisíariu ne’ebé simu ona produtu Cesta Bázika hamutuk ema millaun 1,3 resin ka reprezenta 91,8% hosi totál benefisiáriu hamutuk ema millaun 1,5.

Molok Sekretariadu Tékniku Fundu COVID-19 realiza pagamentu, kompañia sira hotu tenke kumpre devér hodi selu impostu rendimentu  0,5% hosi totál rendimentu konforme Lei Tributária haruka.

Kompañia sira tenke aprezenta resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál.

Karik kompañia fornesedór sira iha pergunta ka difikuldade ruma ka presiza informasaun liután kona-ba asuntu impostu, disponível kontaktu Autoridade Tributária (AT) ka vizita portál AT https://attl.gov.tl/ atu hetan informasaun kona-ba pagamentu impostu, submisaun relatóriu mensál/annuál inklui pedidu emisaun ba Certidão de Dividas.

Aleinde ne’e, pagamentu impostu bele halo liuhosi mákina ATM P24, ne’ebé kontribuinte sira la presiza ba forma tan iha banku komersiál sira hanesan uluk.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here