Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

DILI, 07 jullu 2021 (TATOLI)—Diretór Asosiasaun Halibur Defisiente Matan Timor-Leste (AHDMTL), Gaspar Afonso informa, iha fulan-maiu, Australian Volounteers International (AVI) fó apoiu orsamentu $9.999 ba AHDMTL ba programa kultura nian liu-liu atu dezenvolve no promove kultura dansa tradisionál.

Notísia Relevante: AHDMTL fó formasaun Letra Braille ba ema defisiénsia matan

“AVI fó apoiu ba AHDMTL bazeia ba proposta ne’ebé mak AHDMTL hato’o no proposta refere ne’e AVI konkorda no AVI prepara ona osan $9.999 atu fó apoiu ba programa kultura AHDMTL nian. Servisu entre AVI no AHDMTL suporta formadór hosi Asosiasaun Furak Timor ne’ebé sei dezenvolve no promove dansa tradisionál, poezia no múzika durante fulan neen (6), hosi juñu to’o dezembru 2021,” Diretór AHDMTL hateten ba Agência TATOLI, iha nia knaar fatin, Manleuana, kinta ne’e.

Programa hirak ne’e, AHDMTL nia inisiativa hakarak hamosu divizaun arte no kultura atu dezenvolve programa ne’e. Programa ne’e estabelese iha 2018 tanba ho objetivu atu dezenvolve no promove talentu ema ho defisiénsia matan iha Timor-Leste.

Programa kulturál ho tema “Taka Imi-Nia Matan, Loke Imi-Nia Fuan” ne’e refleta katak ema ho defisiénsia matan sira ne’e, sira-nia matan labele haree maibé sira-nia fuan no konsiénsia nakloke ba ema hotu.

Entretantu Diretór Asosiasaun Timor Furak, Olívio dos Santos, hateten sira iha vontade hodi fó formasaun ha ema ho defisiénsia matan sira tanba sira halo parseiru ho AHDMTL hodi hasa’e sira-nia kapasidade iha área arte no kulturál nian.

“Bainhira ita fó treinamentu ba ema defisiénsia matan sira sempre iha dezafiu. Primeiru tanba sira labele haree. Maibé, ami uza mekanizmu ne’ebé jestu ho língua ba dansa tradisionál, poezia, múzika no mós teatru. Maibé parte seluk ema ho defisiénsia iha memória ne’ebé di’ak tanba akapta lalais no sira-nia tilun ne’ebé di’ak entaun ho ne’e sira konsege akapta lalais liu kompara ho ema lahó defisiénsia matan. Tanba sira-nia memória akapta matéria ne’ebé hanorin ne’e lalais liu,” nia dehan.

Esperiénsia ida-ne’e, nia hateten, ema defisiénsia matan sira aprezenta dansa iha fatin barak ona no Asosiasaun Timor Furak akompañia, maibé sira-nia aprezentasaun mesak furak tanba dala barak sira aprezenta ne’e hatais roupa tradisionál tais be furak.

“Ami só haree no akompaña depois hariku tan de’it sira-nia kolesaun dansa ne’e,” Olívio hateten.

Aleinde ida-ne’e, Asosiasaun Timor Furak mós iha prosesu negosiasaun hodi apoiu fali grupu ida ho naran Sentru Dezenvolvimentu Inkluzaun (SDTL) ne’ebé halibur ema defisiénsia fíziku, tilun no mentalidade.

“Ba ami difísil fó treinamentu ba ema defisiénsia tilun tanba dansa ne’e presiza rona di’ak mak dansa. Maibé, ami esforsu atu oinsá sira bele partisipa hotu iha programa ne’e,” nia dehan.

Bainhira sira fó-hanorin ba ema defisiénsia matan sira, sira sempre iha esperansa tanba ema defisiénsia matan sira-ne’e, sira iha mentalidade no memória ne’ebé furak tebes.

“Ami-nia esperansa mak Estadu no Governu tenke fó atensaun liután. Fó mós espasu no opurtunidade no kbiit ba sira para, sira bele hatudu sira-nia talentu kona-ba Arte Kultura nian. Tanba ne’e ami husu Governu atu apoiu ba ema ho defisiénsia tanba ita ema hanesan hotu. Ami-nia parte ne’e apoiu voluntáriu de’it maibé Governu mak tenke tau-matan,” nia haktuir.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here