Estudante Colegio Santo Inacio de LOIOLA hahu fali ona prosesu aprendisasen hafoin priense kriteria husi Ministeriu Edukasaun no Ministeriu Saude. Imajen/Antonio Goncalves

DILI, 25 juñu 2020 (TATOLI)-Ministru Edukasaun Juventude no Desportu Foun, Armindo Maia, hateten atu re-ativa prosesu aprendizajen ba estudante sira tenki la’o fazeadamente tuir preparasaun no kondisaun eskola idaidak iha territóriu Timor-Leste.

Nia dehan, eskola idaidak tenke kumpre padraun Ministériu Saúde no Organizasaun Mundiál Saúde hanesan, instala ekipamentu fase liman, estudante tenki uza máskara, garante distansia sosiál no fiziku, prepara fatin lixu no seluk tan hodi prevene transmisaun surtu COVID-19 iha Timor-Leste.

“Ita mós tenki haree ho didiak atu re-ativa eskola sira, ita labele arbiru de’it depois kuandu buat ruma akontese ita mak sei simu konsekuénsia, ne’e duni ha’u konkorda loke eskola fazeadamente di’akliu maibe tenke aselera,”dehan nia ba Jornalista sira iha ninia servisu fatin Vila-Verde, kinta ne’e.

Governante ne’e informa Coronavirus hanesan pandemia global ne’ebé daudaun ne’e mundu tomak enfreta tanba ne’e MEJD tenki koidadu ho ninia desizaun sira bainhira atu re-ativa prosesu aprendizajen ba estudante sira.

Nia hatutan bainhira eskola sira kria ona kondisaun ba estudante no profesór sira maka Governu sei fó autorizasaun  hodi re-ativa ona prosesu aprendizajen.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here