Produtu Cesta Bázika. Imajen TATOLI/Antónia Gusmão

DILI, 23 Juñu 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19 kria ona Commitment Payment Voucher (CPV) no Purchase Requisition (PR) foun Cesta Bázika ho montante millaun $32,2 hosi kompaña lokál hamutuk 108.

Dokumentu transasaun foun hamtuk 108 ne’e, kompostu hosi Ministériu Turizmu, Komérsiu no Indústria (MTKI) iha CPV hamutuk 67 ho valór millaun $21,3, Sekretaria Estadu Kooperativa (SEKoop) iha CPV 17 ho montante millaun $7,9 no Ministériu Agrikultura no Peska (MAP) iha CPV 24 ho montante millaun $2,9.

“Hafoin hetan aprovasaun, Sekretariadu Tékniku haruka filafali ona CPV no PR foun ba instituisaun tolu ne’e atu hahú prosesu aprovizionamentu interna hanesan kria Purchase Order, Contract Management, Inspection, Normal Payment, Payment Request Tracking no Expense Voucher,” refere nota MF nne’ebé Agência TATOLI asesu, kuarta ne’e.

Nune’e, ministériu implementadór hirak ne’e sei prepara pedidu pagamentu hodi submete filafali mai Sekretariadu Tékniku ho prosesu normál másimu loron-lima nia laran.

Hafoin konklui prosesu aprovizionamentu interna, ministériu implementadór sira verifika uluk dokumentu komprovativu atu asegura dokumentu hirak ne’e kompletu, loos no prienxe ona rekezitu pagamentu molok submete ba Sekretariadu Tékniku.

Hafoin simu ona pedidu pagamentu hosi ministériu implementadór sira, sei prosesa dokumentu sira hotu no sei realiza pagamentu bazeia ba pedidu ne’ebé mak prienxe rekezitu pagamentu no ba hirak ne’ebé la prienxe rekezitu pagamentu, sei devolve ba ministériu implementadór sira hodi kompleta no submete filafali.

Maibé, molok Sekretariadu Tékniku realiza pagamentu, kompañia hotu tenke kumpre dever hodi selu impostu rendimentu ka income tax 0,5% hosi totál pagamentu, no kompañia sira tenke aprezenta resibu pagamentu impostu rendimentu ba Sekretariadu Tékniku, atu nune’e bele realiza pagamentu finál.

Karik kompaña fornesedór sira iha pergunta ruma ka presiza informasaun liután kona-ba asuntu impostu, bele kontaktu Autoridade Tributária (AT) ka vizita portál https://attl.gov.tl/ atu hetan informasaun kona-ba pagamentu impostu, submisaun relatóriu mensál ka anuál no pedidu emisaun ba Certidão de Dividas.

Pagamentu impostu mós bele halo liuhosi mákina ATM P24, ne’ebé kontribuinte sira la presiza ba forma tan iha banku komersiál sira hanesan uluk.

Enkuantu, ba Sentru Lojístiku Nasionál (CLN, sigla portugés) sira-nia CPV sei iha hela prosesu verifikasaun dokumentu no bainhira hetan ona aprovasaun, Sekretariadu Tékniku sei haruka filafali ba CLN hodi hahú prosesu aprovizionamentu interna.

Ba kestaun ne’e, Sekretariadu Tékniku komprometidu atu kontinua serbisu hamutuk ho Ministériu Implementadór sira hodi konklui pagamentu programa Cesta Bázika.

Iha OJE Retifikativu 2021, iha Fundu COVID-19 ne’ebé uluk ho montante millaun $31, hetan ona reforsu millaun $256,6, nune’e ninia totál hamutuk millaun $287,6, ne’ebé aumentu iha dotasaun Fundu COVID-19 ne’e fó biban ba Governu hodi aloka tan millaun $31 atu konklui pagamentu programa Cesta Bázika.

Hosi 19 marsu to’o iha 31 maiu 2021, MF realiza ona pagamentu Cesta Bázika ho valór millaun $27,6 ba kompañia lokál 109, ne’ebé kumpre ona sira-nia dever hodi selu impostu rendimentu 0,5% ba Autoridade Tributária MF ho totál kontribuisaun impostu hamutuk $138,3.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here