Matebian nu’udár membru Polísia Nasionál Timor-Leste (PNTL), primeira sarjentu Rosantina dos Santos. Imajen Facebook.

DILI, 07 jullu 2021 (TATOLI)—Suspeitu ho inisiál AS ne’ebé oho membru Polísia Nasionál Timor-Leste (PNTL), primeira sarjentu Rosantina dos Santos nu’udar laen ho oan ida.

“Bainhira bin monu, ami konsege transporta kedan ba Ospitál Nasionál Guido Valadares (HNGV, sigla portugés) maibé la konsege salva”, Diamantino dos Santos nu’udar alin hosi matebian haktuir.

Kazu ne’e akontese iha bairru Beto Barat, aldeia Anin Fuik, suku Madohi, postu administativu Don Aleixo, munisípiu Dili, tersa, tuku 23.30.

Diamantino dos Santos haktuir kronolojia; suspeitu ba bolu vítima iha viziñu nia-uma hodi buka-tuir sira nia-oan mane ne’ebé kalan boot ona seidauk tama uma.

Notísia relevante:PNTL sei aprezenta rezultadu autópsia Levenita Madeira ba MP

Bainhira matebian to’o uma, mosu funu-ibun entre sira na’in-rua nu’udar feen ho la’en. Hosi diskute malu ne’e, suspeitu lori katana taa vítima iha parte kotuk laran, hafoin lori tan tudik sona iha parte kalilin, rezulta monu ran sai barak.

Tuir Diamantino dos Santos, bainhira nia-bin monu ho raan-fakar, suspeitu halai sai hosi uma no entrega án kedan iha Komandu Kaikoli.

Parte polísia tun ona iha terrenu hodi rekolla evidénsia hanesan tudik ho katana, no dada ona police line (liña polísia) iha fatin akontesimentu hodi submete ba investigasaun.

Oras ne’e daudaun mate-isin rai hela iha mortuáriu HNGV, hodi submete ba prosesu autoposia.

Matebian ho suspeitu nu’udár feen ho la’en ne’ebé iha oan na’in-ida, hosi postu administrativu Venilale, munisípiu Baukau.

To’o notísia ne’e públika Tatoli seidauk halo konfirmasaun ho  parte polísia.

Jornalista       : Nelson de Sousa

Editór             : Cipriano Colo

HAKEREK NO HATÁN

Please enter your comment!
Please enter your name here