Portavóz Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira.

DILI, 18 maiu 2021 (TATOLI)—Polísia Nasionál Timor-Leste (PNTL), seidauk bele fó-sai rezultadu autópsia mate-isin Levenita Madeira (40), maibé sei asegura hodi aprezenta ba Ministériu Públiku (MP).

Portavóz Komandu Jerál PNTL, Superintendente Xefe, Arnaldo de Araújo, hateten prosesu autópsia hala’o tiha ona, maibé parte investigadór hosi Serbisu Investigasaun Kriminál Nasionál (SIKN), sei kontinua rekolla dadus iha fatin krime-nian.

Notísia relevante:Levenita Madeira hakotu-iis ho tara an, família husu investigasaun kle’an

Nia dehan, SIKN sei asegura evidénsia hodi aprezenta provas ba Ministériu Públiku (MP), nu’udár na’in ba prosesu kazu, hodi aprezenta ba Tribunál Distritál Dili (TDD).

“Ita seidauk bele fó-sai rezutladu autópsia ba públiku, tanba ne’e sei segredu justisa no na’in ba prosesu maka Ministériu Públiku atu aprezenta kazu ne’e ba Tribunál,” Arnaldo de Araújo hateten liu hosi konferénsia imprensa, iha Komandu Jerál PNTL Caicoli, Dili, tersa ne’e.

Arnaldo de Araújo hatutan, PNTL tenki respeita prosesu investigasaun, hodi asegura kazu ne’e ninia rezultadu autópsia, nu’udár prosesu justisa ne’ebé parte família matebian, inklui matebian-nia kaben atuál Sekretáriu Estadu Arte no Kultura (SEAK), Teófilo Carldas, kolabora hodi fó dadus ba PNTL atu bele  konklui prosesu investigasaun.

PNTL rasik simu ona keixa hosi família matebian Levenita Madeira, kona-bá agresaun fízika, ne’ebé matebian nia kaben halo durante sei moris to’o matebian hakotu-iis mistériu ho kondisaun tara an iha rezidénsia Bebonuk suku Madohi, postu administrativu Dom Aleixo, munisípiu Dili, domingu (16/05).

Parte PNTL simu mós dadus no dokumentu hanesan fotografia kona-bá agresaun fízika ne’ebé halo nu’udár evidénsia ida ba parte investigadór SIKN asegura hela hodi junta ho dadus investigasaun ne’ebé rekolla ona.

Mate-isin Levenita Madeira, parte HNGV hala’o tiha ona autópsia no horisehik entrega ona mate-isin ba matebian-nia kaben, Teófilo Caldas, hodi lori fila ba rezidénsia.

Tuir planu, serimónia funerál sei hala’o iha semitériu públiku Becusse, Dili iha tuku 15:00.

Iha parte seluk, reprezentante família hosi matebian, Levenita Madeira, Brígida Soares dehan, prontu koopera nafatin ho PNTL hodi loke prosesu invetigasaun ba kazu ne’e.

“Rezultadu autópsia seidauk fó-sai ba ami família, no ami prontu koopera nafatin ho PNTL no ami mós aprezenta ona keixa ba polísia ho evidénsia kona-bá aktu violénsia ne’ebé matebian nia kaben halo durante ne’e,” Brígida Soares hateten.

Serbisu Investigasaun Kriminál Nasionál (SIKN) mós bolu ona Sekretáriu Estadu Arte no Kultura (SEAK), Teófilo Caldas, hodi halo indentifkasaun nu’udár sasin ba kazu ninia kaben Levenita Madeira.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here