Diretór Jerál SEFOPE, Paulo Alves. Imajen TATOLI/Francisco Sony

DILI, 06 jullu 2021 (TATOLI)–Diretór Jerál Sekretaria Estadu Formasaun Profisionál Empregu (SEFOPE), Paulo Alves, informa, konstrusaun Sentru Formsaun Exelente daudaun ne’e iha ona preparasaun atu tama estudu viabilidade.

“Daudaun iha ona faze konsultasaun ho Ajénsia Nasionál Dezenvolvimentu (ADN), hein preparasaun atu halo publikasaun ba estudu viabilidade,” Diretór Jerál ne’e hateten ba Agência TATOLI, iha salaun City 8, Manleuna, tersa ne’e.

Tuir Dirijente ne’e, provizóriamente iha kompañia hitu ne’ebé haat estranjeiru no tolu lokál maka submete ona aplikasaun hodi konkorre halo estudu viabilidade ba sentru ne’e.  

“Espera tempu badak bele finaliza. Sentru Formasaun Exelente ho standar internasionál no sei sai modelu iha Ázia Pasífiku, tanba ne’e presiza kompañia sira ne’ebé iha esperiénsia naton hodi bele tuir konkursu ne’ebé maka loke liuhosi Komisaun Nasionál Aprovizionamentu (CNA, sigla portugés),” nia akresenta.

Notísia relevante: Governu sei kria task force ba konstrusaun Sentru Formasaun Exelente

SEFOPE halo ona preparasaun atu hasai avizu, tanba ne’e hein iha tempu badak CNA sei deside.

“Sentru ne’e iha eskola ne’ebé fó formasaun ba área ospitalidade, otelaria marítima no seluk seluk tan, ne’ebé ami bolu Sentru Formasaun Inklusivu tanba ita hakarak inklui maluk portadór difisiénsia ne’ebé maka hakarak tuir formasaun iha fatin ne’e,” nia hatutan.

Nia dehan, iha posibilidade alokasaun orsamentu ba konstusaun sentru ne’e sei aumenta.

“Molok ita tama impase polítika, proposta orsamentu ba dezeñu konstrusaun sentru hamutuk millaun $15, maibé tanba agora ita halo levantamentu foun, prosesu mós foun, ita labele deside totál orsamentu hira maka ita presiza ba futuru,” nia dehan.

Sentru Formasaun ne’e sei akumula ema to’o 5.000 no sei harii iha rai ho medida ektare 21.

Komunidade afetadu hosi projetu ne’e hamutuk 74, tanba ne’e Governu sei matein fó indeminizasaun ho opsaun rua mak hanesan, fó de’it osan no opsaun seluk maka halo bairru foun, depende ba kondisaun.

Jornalista : Natalino Costa  

Editora     : Julia Chatarina

HAKEREK NO HATÁN

Please enter your comment!
Please enter your name here