Primeiru-Ministru, Taur Matan Ruak, konvoka reuniaun ho entidade relevante hosi liña ministeriál, hodi harii ekipa task force, iha Palásiu Governu, kinta (04/03). Imajen/Mídia GPM

DILI, 04 marsu 2021 (TATOLI)–Governu sei kria ekipa task force ida ba konstrusaun Sentru formasaun Exelente iha tinan ne’e, ne’ebé tuir planu sei okupa rai ektare 21 iha postu administrativu Metinaro, munisípiu Dili.

“Ami hetan konvite hosi Primeiru-Ministru hodi partisipa reuniaun hamutuk ho Ministru Koordenadór Asuntu Ekonómiku, Sentru Formasaun Senai Bekora no Tibar inklui entidade seluk, hodi ko’alia kona-ba atu kria ekipa task force hodi realiza ona kontrusaun Sentru Formasaun Exelente,” Sekretáriu Estadu Formasaun Profisionál no Empregu (SEFOPE), Alarico do Rosário, informa hafoin ramata reuniaun ho Primeiru-Ministru, Taur Matan Ruak no entidade relevante iha Palásiu Governu, kinta ne’e.

Notísia relevante: SEFOPE atualiza konstrusaun Sentru Formasaun Exelente ba PM Taur

Entidade ne’ebé sei envolve kompostu hosi Ministériu Justisa (MJ), Sekretaria Estadu Terra no Propriedade (SETP), Sekretaria Estadu Ambiente (SEA), Ministériu Obra Públiku (MOP), Ministériu Edukasaun, Juventude no Desportu (MEJD), Ajénsia Dezenvolvimentu Nasionál (ADN), Institutu Petróleu no Jeolojia (IPG, sigla portugés), SEFOPE no Gabinete Primeiru-Ministru (GPM).

“Ami foin halo diskusaun ba preparasaun, ne’ebé ami sei halo estudu viabilidade ba rai,” governante ne’e akresenta.

Governu prevee ona orsamentu hamutuk millaun $15 ba dezeñu no konstrusaunsentru, ne’ebé sei kompleta ho fasilidade no asesibilidade ba maluk portadór no difisiénsia sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here