Deputadu PD, Adriano do Nascimento. Foto TATOLI

DILI, 06 jullu 2021 (TATOLI)—Vise-Xefe Bankada Partidu Demokrátiku (PD), Deputadu Adriano do Nascimento, konsidera sistema ho modelu orsamentu kada programa atubele garante transparánsia no kontabilidade iha ezekusaun orsamentál.

Notísia Relevante: PN aprova proposta-lei enkudramentu orsamentál iha jeneralidade

“Ha’u pesoál konkorda hodi halo mudansa ba sistema modelu orsamentu por programa (orsamentu kada programa). Ha’u mós iha fiar ida katak orsamentu por programa bele garante transparánsia no kontabilidade,” Vise-Xefe Bankada Partidu Demokrátiku ko’alia asuntu ne’e iha ámbitu diskusaun ba proposta-lei enkuadramentu orsamentu estadu no jestaun finanseira, iha faze jeneralidade, tersa ne’e

Maibé Deputadu Adriano halo leitura ba artigu hirak-ne’ebé hatuur iha proposta-Lei Enkuadramentu Orsamentál (LEO) no lé relatóru komisaun C (Finansa Públika), hamosu preokupasaun kona-ba kestaun legál no konstitusionál.

Membru Komisaun A ne’ebé trata asuntu Konstitusionál no Justisa ne’e hakarak hetan esplikasaun detallada hosi Governu kona-ba razaun fundamental altera Lei Orsamentu no Jestaun Finanseira (LOGF-sigla portugés).

“Kestaun mak ne’e, sá problema mak Ministériu Finansa identifiKa ona katak LOGF ne’e, iha limitasaun ka problema hodi satán dezenvolvimentu nasaun nian. Governu liuhosi proposta LEO ne’e propoin atu elimina figura ida iha LOGF hanesan; servisu no fundu autónomu, fundu konsolidadu ne’ebé iha tezouru ida ho setór tolu. Ha’u-nia pergunta mak ne, tanbasá Governu hakarak muda figura ida-ne’e,” Deputadu Adriano preokupa.

Nia esplika, LEO halo eskluzaun ba OJE iha entidade públika ho forma empresa, fundasaun no asosiasaun nune’e mós esklui setór publiku la’ós-emprezariál hanesan Banku Sentrál Timor-Leste (BCTL-sigla portugés no fundu petroliferu.

“Ha’u-nia pergunta, razaun saída mak Governu hakarak esklui OJE hosi entidade hirak ne’e,” Reprezentante povu hakarak hetan esplikasaun hosi Ministru Finansa Rui Augusto Gomes.

Nia hatutan, polítika ba fundu kontinjénsia tuir LOGF katak labele liu 5% hosi valór OJE, maibé iha proposta LEO laiha limitasaun. Maibé artigu iha LEO ne’e hateten de’it fundu kontinjénsia labele ki’ik-liu 2%.

“Ha’u konklui katak artigu ida-ne’e, halakon ona kompeténsia Parlamentu Nasionál hodi halo aprovasaun OJE ho detalladu no sees ona hosi prinsípiu orsamentu por programa, tanba fundu kontinjénsia la deskreve programa detalladu,” nia hateten.

Tuir nia, opiniaun modesta (opiniaun simples) katak artigu 47 hosi proposta LEO interven ona kompeténsia Parlamentu Nasionál nian, tanba Governu liuhosi artigu ne’e fó limitasaun ba PN ho tempu loron 10 atu aprova proposta-lei ida hosi Governu.

Nune’e mós artigu 96 iha proposta LEO halakon limitasaun transferénsia 20% hosi kada ministériu ne’ebé hatuur ona iha LOGF artigu 38 tanba artigu 96 ne’e la enkoraja ministériu sira atu hatudu sira-nia dezempeñu di’ak maibé Governu proteje inkapasidade membru Governu iha ezekusaun programa no orsamentu.

Membru Komisaun A ne’e preokupa ho artigu 51 hosi proposta LEO ne’ebé fó kompeténsia ba Unidade Planeamentu, Monitorizasaun no Avaliasaun (UPMA) boot-liu ministériu sira tanba artigu ne’e fó kompeténsia ba UPMA atu rezeita programa no orsamentu hosi ministériu sira.

“Ho razaun hirak-ne’e, ha’u hakarak Ministru Finansa atu esklarese ba ha’u kona-ba kestaun téknika, legál no konstitusionál,” nia husu.

Hatán ba preokupasaun ne’e, Ministru Finansa Rui Augusto Gomes, fundamenta razaun prinsipál halo revizaun ba LOGF tanba implementasaun OJE iha lákuna no limitasaun.

“Ami propoin 2% atu asegura resposta ne’ebé Governu bele fó bainhira mosu dezastre ne’ebé ita la prevee ba kestaun sira-ne’ebé urjénsia maibé Governu mós la impoin limite másimu ba dotasaun rezerva kontinjénsia. Karik Parlamentu Nasionál propoin atu altera artigu númeru 32 entaun Governu nakloke ba proposta-alterasaun hodi estípula valór másimu iha-ne’ebá,” nia esplika.

Maske nune’e, Ministru Finansa ne’e informa ba deputadu sira katak parte Governu nakloke ba debate kona-ba proposta LEO ne’ebé atu troka LOGF ne’e.

Governu liuhosi Ministériu Finansa propoin halo revizaun ba númeru 3/2009 kona-ba Lei Orsamentu no Jestaun Finanseira (LOGF-sigla portugés). Iha proposta-lei foun ne’e mantein artigu hamutuk 16, altera artigu hamutuk 22, retira artigu 17. Entretantu proposta-lei foun ne’e aumenta tán artigu 61 kompara ho lei númeru 13/2009 nune’e proposta-lei foun ne’e iha artigu hamutuk 116 kompara ho artigu 55 iha lei vijente.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here