Logotipu SERVE,I.P

VIQUEQUE, 05 jullu 2021 (TATOLI)—Hahú hosi janeiru to’o juñu 2021, Serbisu Rejistu no Verifikasaun Emprezariál, Institutu Públiku (SERVE,I.P) rekolla $707,50 ba krofre Estadu.

“Iha Estadu emerjénsia no serka sanitária ami haree laiha kompañia ida mak taka, maibé balun mai rejista foun hamutuk 89. Pagamentu ne’ebé ami simu husi janeiru to’o juñu 2021 hamutuk $707,50 no ami hatama ona ba kofre Estadu,” Koordenadór SERVE,I.P, Josenito Gonçalo Pereira de Jesus, hateten ba jornalista Agência Tatoli, iha munisípiu Viqueque, segunda ne’e.

Notísia relevante:PNDS Viqueque kapasita EJS na’in 15

Koordenadór ne’e hatutan, atividade ne’ebé empreza lokál-sira iha munisípiu Viqueque hala’o maka, emperza-sira maioria halo negósiu ki’ik ho tipu empreza individuál no iha empreza 10-resin mak hala’o konstrusaun.

Tuir dadus SERVE Munisipál katak, kada tinan, empreza ida halo renovasaun ba sertidaun komersiál selu $10, empreza médiu no altu kada tinan tenke selu $45.

Iha fatin hanesan diretora empreza Ojo Guterres, Odete Juvita Guterres, hateten empreza ne’e hala’o negósio iha adeia Sira-Lari, suku Caraubalu, durante implementasaun Estadu emerjénsia no serka sanitária sasán la folin, maibé empreza selu tasa ba Estadu.

“Ami loke empreza maibé la’ós empreza boot, loke empreza ki’ik no ami faan sasán nesesidade bázika, durante Estadu emerjénsia no serka sanitária sasan la folin. Loron ida la to’o $16,” Odete Juvita Guterres hateten.

Tuir dadús ne’ebé Agência Tatoli asesu hosi SERVE munisipál, empreza lokál ne’ebé resjitadu iha munisípiu Viqueque iha tinan 2020, iha empreza foun ne’ebé renova no halo alterasaun hamutuk 128.

SERVE destaka iha munisípiu Viqueque iha fulan jullu 2020 no hosi jullu to’o dezenbru rekolla reseita hamutuk $1.542.

Iha 2021, empreza ne’ebé  rejista foun hamutuk 89, renovasaun 44, aumenta atividade 18, alterasaun 13.

Reseita ne’ebé SERVE rekolla hosi empreza-sira ne’ebé halo renovasaun hahú hosi janeiru hamutuk $198, fevereiru $260, marsu $90, abríl $107, maiu $43, juñu $69,50 ho totál $707,50.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here