Ministru Justisa, Manuel Cárceres da Costa. Imajen Tatoli/Egas Cristovão.

DILI, 06 jullu 2021 (TATOLI)—Ministru Justisa (MJ), Manuel Cárceres da Costa, halo ona mudansa ba funsionáriu ho kargu xefia iha ministériu ne’e.

Manuel Cárceres da Costa, hateten kargu xefia ne’ebé hetan mudansa ba kna’ar hosi diresaun tutela mak hanesan Diresaun Nasionál Terras no Propriedade (DNTP), Serbisu Rejistu Notariadu no serbisu sentrál MJ konta mós ho xefe departamentu lubuk ida.

Notísia relevante:MJ-MF kria rejime remuneratóriu ba membru Komisaun Terra no Propriedade

“Simu ona despaixu hosi Komisaun Funsaun Públika (CFP sígla portugés) hahú 01 jullu iha mudansa bo’ot,’’ Manuel Cárceres hateten ba jornalista-sira, hafoin sorumutu ho Primeiru Ministru (PM), Taur Matan Ruak, iha rezidénsia Faról, tersa ne’e.

Governante ne’e klarifika katak, mudansa ne’e la’ós tanba ódiu no vigansa, maibé haree ba iha konvinensia serbisu, hodi kumpre loloos responsabilidade, devér no direitu.

“Tenke iha duni mudansa tanba ha’u-nia filozofia ida katak, kleur demais iha fatin ida kria kankru podér, nune’e di’ak liu halo tiha mudansa hodi fó liu efetividade ba ema atu halo mudansa ba pensamentu no espiritu serbisu ho di’ak liu-tán,’’ nia subliña.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here