Primeiru-Ministru, Taur Matan Ruak, hamutuk ho Embaixadór Austrália iha Timor-Leste, Peter Roberts, halo diskusaun kona-ba kooperasaun bilaterál, iha Rezidénsia Farol, tersa (06/07). Imajen TATOLI/Egas Cristóvão

DILI, 06 jullu 2021 (TATOLI)--Governu Austrália iha kompromisu boot kontinua apoia vasina ba Timor Leste atu kombate COVID-19.

“Austrália sei kontinua apoiu vasina AstraZeneca mai Timor-Leste nia programa vasinasaun to’o kobre populasaun 80%,” Embaixadór Austrália iha Timor-Leste, Peter Roberts, hateten, hafoin ramata reuniaun ho Primeiru-Ministru, Taur Matan Ruak, iha Rezidénsia, Farol, Dili, tersa ne’e.

Governu Austrália apoiu ona vasina tipu AstraZeneca hamutuk 135.000 no sei kontinua nafatin.

Embaixadór Austrália iha Timor-Leste, Peter Roberts. Imajen TATOLI/Egas Cristóvão

“COVAX Facility asume 20%, ne’ebé Austrália kontinua kompromisu nafatin apoia Timor-Leste la’ós vasina ka sasán de’it, maibé apoia téknika iha prosesu implementasaun prevene COVID-19,” nia akresenta.

Notísia relevante: Governu define objetivu kampaña vasina, kada loron atinje 5.000

Kompromisu ne’ebé nasaun viziñu ne’e fó ba Governu Timor-Leste hanesan meiu ida atu hamutuk iha situasaun defísil atu tulun populasaun luta kombate COVID-19.

Iha biban ne’e, Diplomata australianu ne’e informa ba Xefe Govenru katak Austrália iha kompromisu hametin relasaun bilaterál, liuliu apoia atu responde ba dezestre naturál, seguransa terrestre no marítima.

Daudaun ne’e ema hamutuk 200.000 iha territóriu Timór mak simu ona vasina doze dahuluk kontra COVID-19, ne’ebé reprezenta populasaun 26,5% ho idade 18 ba leten.

Iha Dili ema hamutuk 110.442 simu ona vasina doze dahuluk, reprezenta 51,7%, enkuantu ema 25.656 ne’ebé reprezenta 6,55% simu ona vasina doze daruak iha nível nasionál no ema 13.996 (3,40%) simu ona iha kapitál.

Antes ne’e, Governu liuhosi reuniaun Konsellu Ministru defini ona objetivu kampaña vasinasaun, ho objetivu atu alkansa ema 10.000 bele simu vasina iha loron ida nia laran, iha nível nasionál.

 Jornalista : Florêncio Miranda Ximenes

Editora       : Julia Chatarina

HAKEREK NO HATÁN

Please enter your comment!
Please enter your name here