Vasina AstraZeneca, Imajen TATOLI/António Gonçalves

DILI, 19 maiu 2021 (TATOLI)—Durante reuniaun Konsellu Ministru (KM) aprova ona Projetu Rezolusaun Governu, aprezenta hosi Ministru Prezidénsia Konsellu Ministru, Fidelis Manuel Leite Magalhães, ne’ebé define objetivu hosi kampaña vasina.

“Rezolusaun Governu ne’e define hanesan objetivu atu alkansa iha kampaña vasina, loron ida númeru vasina 5.000, ne’ebé orienta departamentu relevante sira ho hanoin atu kria mekanizmu nesesáriu sira hodi aselera ritmu vasinasaun nian,” Portavóz Governu relata hafoin ramata reuniaun ezekutivu, iha salaun Ministériu Finansa (MF), Aitarak-laran, kuarta ne’e.

Ba kestaun ne’e, entidade relevante fó mós orientasaun ba departamentu Governu, ho hanoin atu prevene regulamentu internu nesesáriu sira hodi asegura kumprimentu ba medida preventiva ne’ebé vigór iha funsionamentu internu servisu no iha atendimentu públiku.

Vasinasaun parsiál ka kompleta define ona hanesan kritériu relevante, ne’ebé administrasaun públika tenke adota iha determinasaun funsionáriu sira iha rejime serbisu prezensiál.

Tuir planu, iha faze dahuluk vasina sei kobre populasaun 8%, ne’ebé 3% korresponde ba traballadór liña frente, liuliu funsionáriu sira ne’ebé serbisu iha unidade kuarentena no izolamentu, ka iha postu entrada hanesan aeroportu, portu no terrestre, no 5% sei abranje ba populasaun ne’ebé hela iha área besik fronteira terrestre no ema sira konsidera risku ba kontaminasaun.

Iha faze daruak, sei abranje populasaun 12%, inklui sidadaun sira ne’ebé ho idade 60, liuliu sira ne’ebé hela iha Rejiaun Administrativa Espesiál Oé-cusse Ambeno (RAEOA), iha Dili, Covalima no Bobonaro.

Aleinde ne’e, iha faze daruak sei abranje mós, profisionál saúde, profesór, pesoál restaurasaun, loja no merkadu sira, pesoál konfisaun relijioza sira, no líder komunitáriu no polítiku sira ne’ebé hela iha RAEOA, Dili, Covalima, no Bobonaro.

Grupu sira ne’ebé integra iha faze datoluk hamutuk 80% populasaun ne’ebé hela iha Timor-Leste, ne’ebé sei define konstante ba evolusaun klíniku nasionál sira no ritmu fornesimentu vasina.

Vasina ne’e sei efetua iha estabelesimentu Servisu Nasionál Saúde, ne’ebé sei aloka ekipa treinada vasinasaun sira, hodi haree espesifikasaun vasina kontra COVID-19.

To’o loron 01 maiu, ema 28.678 iha territóriu tomak simu ona vasina AstraZeneca doze dahuluk, hosi vasina ne’ebé Timor-Leste simu iha faze dahuluk.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here