Ministru Petróleu no Minerál, Víctor da Conceição Soares. Imajen TATOLI/Egas Cristóvão

DILI, 31 maiu 2021 (TATOLI)--Ministru Petróleu no Minerál (MPM), Víctor da Conceição Soares, hateten, Governu Timor-Leste espera perfurasaun faze dahuluk hosi empreza Santos bele konklui ho rezultadu pozitivu hodi hanaruk vida útil iha kampu petrolífera, Bayu-undan.

“Tuir loloos vida útil no produsaun hahú menus ona iha kampu Bayu-undan no tuir kálkulu sei hotu iha tinan 2022, maibé iha fali perfurasaun hosi Santos. Nune’e Governu nia esperansa mak atu halo naruk tan vida útil produsaun iha ne’e ho extensaun tinan-ida tan, maibé depende ba rezultadu perfurasaun,” Ministru Víctor hateten ba Agência TATOLI, iha edífisiu Ministériu Finansa, Aitarak-laran, segunda ne’e.

Iha semana kotuk, empreza australiana ne’e halo ona mobilizasaun materiál ba instalasaun iha área kontratu, hodi halo perfurasaun ba posu dahuluk entre posu tolu ne’ebé planeia ona.

Notísia relevante: Santos hahú mobiliza materiál perfurasaun bá kampu Bayu-undan

“Ami akompaña sira (Santos) nia kalendáriu perfurasun komesa ona atu fura posu dahuluk, ba perfurasaun daruak ne’e sei realiza iha fim do ano (2021) no perfurasaun datoluk iha inísiu tinan 2022,” nia informa.

Ministru dehan, Governu kontinua apoia hodi atividade ne’e bele la’o ho di’ak no lalais.

“Ita-nia polítika, empreza ne’e apoia tebes tanba perfurasaun ne’e hahú diskusaun iha tinan 2020 no ita iha kooperasaun di’ak no fasilita sira, tanba ne’e bele avansa ona ba atividade,” nia hatutan.

Empreza Santos nu’udar operadór konsórsiu ne’ebé iha projetu kampu Bayu-undan, antes ne’e anunsia ona katak programa perfurasaun mina-matan iha tasi laran Timór sei hahú iha tinan ne’e.

Empreza petrolífera ne’e halo perfurasaun ba dahuluk, bainhira kampu Bayu-undan hanesan ona parte esklusiva ida iha jurizdisaun Timor-Leste, hafoin ratifika Tratadu Fronteira Marítima entre Timor-Leste no Austrália.

Desizaun ba faze 3C investimentu ne’e pasa ona avaliasaun rigoroza, ho konsiderasaun ba fluxu-traballu krítiku, inklui análize ekonómika no téknika, estratéjia akizasaun no konteúdu lokál inklui aprovasaun regulamentár atu prezerva valór ekonómiku hosi projetu.

Jornalista: Florêncio Miranda Ximenes

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here