Administradór Munisípiu Aileu, Abel da Conceição. Imajen Tatoli/Egas Cristovão

DILI, 23 abríl 2021 (TATOLI)-Administradór Munisípiu Aileu, Abel da Conceição, informa dadus finál vítima dezastre naturál iha Aileu hamutuk uma-kain 385.

“Kona-ba levantamentu dadus ba vítima dezastre naturál iha Munisípiu Aileu hatudu katak vítima ne’ebé afetadu ba dezastre naturál iha loron 04 abríl liubá hamutuk uma-kain 385,” Abel da Conceição, informa ba Agência Tatoli liuhosi telefónika, sesta ne’e.

Nia hatutan hosi númeru 385 ne’e iha kategoria rua; ida uma estraga totál no ida uma estraga kmaan.

Aileu nia infraestrutura públiku ne’ebé hetan estragu, Abel da Conceição, hateten hanesan bee-bomba boot iha Aileu vila ne’ebé fornese ba Aileu tomak mak hetan estragu totál, inklui kanu ne’ebé liga ba bee-matan sira iha Aileu laran rai monu mota lori lakon, estrada Aileu liga ba Dili  iha Casnafar no hosi Hali-Laran, Dili ba Aileu kotu hotu. Nune’e mós estrada liga Postu Remexiu ba Lekidoe kotu hotu, no Aileu Vila liga ba Postu Remexiu mós kotu to’o agora transporte seidauk bele asesu.

“Agora parte Lekidoe nian mak iha semana kotu ita-nia Amu Pároku Lekidoe nian mak aluga eskavadora hadi’a estrada -ira ne’ebé mak kotu, no hamutuk sarani-sira lori rai taka fila fali rai kuak sira ne’e entaun Postu Lekidoe karreta-motór agora bele la’o normál fali ona,” Abel hateten.

Meiu ne’ebé Governu apoiu ba vítima dezastre naturál mak liuhosi Ministériu Solidariedade Sosiál no Inkluzaun (MSSI), nune’e mós apoiu balun hosi Plan Internasionál, Fundasaun Ázia PREMATIL, Sidade Amiga no ajuda hosi individuál balu ne’ebé dezde akontese inundasaun ne’e fó apoiu ona.

“Vítima sira ne’e sai refujiadu hamutuk iha fatin ida ne’e laiha maibé sira ne’ebé afeta direita ne’e provizóriu hela sira-nia família, no viziñu, entaun sasán ne’ebé Governu no la’ós hosi Governu mai hotu iha Postu Administrasaun Munisípiu mak ami halo tiha pakote foin fahe ba vítima-sira,” Abel da Conceição informa.

Kona-ba vítima dezastre naturál, sira-nia kondisaun,  Abel da Conceição, haktuir daudaun ne’e vítima sira-nia kondisaun di’ak hela no kona-ba hahán mós di’ak hela, maibé karik iha vítima balu mak presiza tan ai-han nia parte sei halo esforsu fó apoiu nafatin ai-han ba vítima sira.

Jornalista       : Arminda Fonseca

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here