Tanente Jenerál Lere Anan Timur. Imajen TATOLI/Egas Cristovão.

DILI, 30 juñu 2021 (TATOLI)—Xefe Maiór Jenerál Forsa Defeza Timor-Leste (F-FDTL), Tenente Jenerál Lere Anan Timur, hateten timor-oan sira-ne’ebé tama-sai iha fronteira ne’e tenke kontribui no koopera hamutuk ho seguransa ba estabilidade, atu nune’e virus variante foun Delta COVID-19 labele da’et ba populasaun sira iha Timor-Leste.

“Ita husu ba ema ne’ebé mak ba-mai iha fronteira no ita hakarak timor-oan hotu-hotu tenke koopera hamutuk ho seguransa ba estabilidade nasaun no povu ne’e nian. Moras COVID-19 ne’e maihosi rai-li’ur no la’ós mosu de’it iha Timor-Leste, tanba ne’e presiza koordena hamutuk atu nune’e vírus variante foun Delta COVID-19 iha Indonézia ne’e labele da’et mai iha Timor-Leste. Moras ida-ne’e bele da’et to’o mai Timor-Leste tanba ema tama-sai iha fronteira,” Tenente Jenerál Lere Anan Timur hateten ba jornalista sira hafoin hasoru malu ho Prezidente Repúblika, Francisco Guuterres Lú Olo, iha Palásiu Prezidensiál Nicolau Lobato, Bairru Pite, Dili, kuarta ne’e.

Lere Anan Timur hateten, tanba variante foun Delta COVID-19 ne’e agora alastra ona iha nasaun viziñu Indonézia, entaun parte defeza (F-FDTL) no seguransa (PNTL) bele prepara no halo kontrolu ba fronteira.

Presiza reforsa seguransa iha fronteira, Tenente Jenerál Lere Anan Timur hatán, presiza aumenta fizikamente iha fronteira maibé tenke reforsa kestaun medida hanesan ema-ne’ebe ultrapasa ba-mai iha fronteira ne’e, Tribunál tenke julga bainhira seguransa sira kaer-toman.

“Ha’u hanoin ona atu reforsa fronteira. Ha’u hateten ba Prezidente Repúblika katak ita aumenta fizikamente ne’e bele maibé ida-ne’e la to’o. Tenke reforsa kestaun medida hanesan ema-ne’ebe ultrapassa ba-mai iha fronteira ne’e, bainhira kaer-toman ne’e Tribunál tenke julga tanba sira halimar ema-nia vida,” nia dehan.

Daudaun ne’e, situasaun COVID-19 iha Timor Osidentál (NTT-sila indonézia) konfirmadu kazu infesaun 18.053 no ema na’in-482 mak mate, no oras ne’e mundu hasoru variante foun Delta COVID-19 ne’ebé oras ne’e alastra ona iha nasaun viziñu Indonézia.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here