MS ho USAID lansa atividade sustentabilidade sistema saúde iha Timor-Leste, iha salaun Novu-Turizmu, sesta (02/07). Imajen Tatoli/Francisco Sony.

DILI, 02 jullu 2021 (TATOLI)—Ministériu Saúde (MS), hamutuk ho Governu Estadu Unidu Amérika (EUA), liuhosi ninia- Ajénsia Internasionál ba Dezenvolvimentu (USAID), lansa atividade  sustentabilidade sistema saúde iha Timor-Leste (TL).

“Ami agradese ba inisiativa USAID atu hahú projetu ida ne’ebé foka liu ba sustentabilidade sistema saúde iha TL. MS nia kna’ar importante teb-tebes ba Sistema nasionál saúde no hein katak, USAID sei kontinua kolabora nafatin ho Instituisaun sira-seluk ne’ebé iha ligasaun direta ka indireta ba prosesu sustentabilidade sistema saúde,’’ Minsitra Saúde, Odete Maria Freitas Belo, hateten durante serimónia lansamentu iha Otél Novu Turizmu, sesta ne’e.

Notísia relevante:MS-OMS kapasita inspetór sanitária 60

Nia konta tuir katak, iha tinan kotuk, MS aprova edisaun dala rua hosi Planu Estratéjíku Nasionál Saúde ne’ebé kobre periúdu 2020 to’o 2030 ne’ebé defini ona saida mak Governu hakarak, relasiona ho pílares hotu-hotu hosi sistema nasionál saúde.

Tanba ne’e, Governante ne’e husu USAID atu apoia nafatin mós MS iha implementasaun polítika Saúde na Familia no análiza meiu atu haforsa sistema Registu Eletróniku Saúde na Familia, bele sai hanesan matadalan ida ne’ebé haforsa sistema saúde hodi asegura katak, laiha ema ida ne’ebé husik iha kotuk.

“Tanba, liuhosi ekipa Saúde na Familia ita bele halo vizita domisiliária, akompaña família nia kondisaun saúde no moris, envolve líder komunitária no promotór saúde na familiar iha prosesu diagnóstiku,” nia subliña.

Iha fatin hanesan Embaixadór EUA iha TL, Kevin Blackstone, konsidera lansamentu Sistema ne’ebé USAID halo, sei ajuda MS no Institutu Nasionál Saúde (INS) ho instituisaun sira-seluk, hodi dezenã no maneza kualidade serbisu saúde ne’ebé di’ak ba Timor-oan hotu.  

USAID finansia atividade sustentabilidade sistema saúde iha Timor-Leste  ho millaun $15.6 ba tinan 2020 to’o 2023.

Montante orsamentu ne’e sei foka hodi aumenta finanseiru ba saúde ne’ebé di’ak, ezemplu, prioritiza  fundu Governu nian ba kuidadu saúde no aumenta papél setór privadu hodi hadi’a fasilidade no programa saúde nian.

Ekipa projetu ne’e sei ajuda ofisiál-sira hodi halo prosedura atu rekruta no treinu profisionál saúde-sira ne’ebé kualidade atu bele serbisu iha territóriu tomak.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here