PA RAEOA-ZEESM TL, Arsénio Paixão Bano, hamutuk ekipa tékniku sira hala’o vizita traballu ba perfurasaun bee-moos iha Bairro Oé-Bor, Aldeia Kaban, Suku Suni-Ufe, Sub-Regional Nitebe. Imajen/RAEOA-ZEESM TL

DILI, 20 marsu 2021 (TATOLI) – Prezidente Autoridade (PA) Rejiaun Administrativu Espesiál Oe-cusse Ambeno no Zona Ekonomia Espesiál Sosiál Merkadu Timor-Leste (RAEOA-ZEESM TL), Arsénio Paixão Bano, hamutuk ekipa tékniku sira hala’o vizita traballu ba perfurasaun bee-moos   iha Bairro Oé-Bor, Aldeia Kaban, Suku Suni-Ufe, Sub-Regional Nitebe.

Vizita ne’e atu haree progresu projetu konstrusaun no perfurasaun sistema Bee-Moos (Lot4) no konstrusaun hala’o hosi Kompañia DACBER. Unip. Lda, hanesan manan na’in ida ne’e no kontrasaun fízika atinje ona porsentu rua (2%).

Notísia Relevante : RAEOA-ZEESM prioritiza medida prinsipál 4 iha proposta OJE

Ba Agência Tatoli liuhosi komunikasaun telefone, sábadu ne’e, Arsénio Bano, informa konstrusaun no perfurasaun bee-moos ida ne’e atu fasilita bee-moos ba iha komunidade sira ne’ebé hela iha aldeia tolu, kompostu hosi Aldeia Oe-nanoe, Fuabano no Kaban.

Dadus RAEOA nian hatudu katak aldeia tolu ne’e akumula uma-kain  571  ho total abitante sira hamutuk 2332.

Arsénio Bano hateten, konstrusaun bee-moos ba tanke ida (1) iha Kiu-ana ho kapasidade 200m3=200 mil litru hodi fornese ba aldeia tolu ne’e, ho total Orsamentu Jerál Estado-RAEOA ne’ebé aloka ba iha ne’ebá $273.074,06.

“Ha’u hakarak apela ba Komunidade sira katak iha tinan 2021 Autoridade RAEOA  tau iha planu anuál bee-moos sai hanesan prioridade prinsipál, atu nune’e komunidade sira iha RAEOA labele halerik  tan ba bee-moos iha tempu bailoron naruk,” Arsénio Bano hateten.

Sekretáriu Estadu Traballu no Solidariedade iha primeiru Governu Konstitusionál (2002-2007) ne’e husu ba komunidade sira atu serbisu hamutuk ho SAS atu haree didi’ak konstrusaun ida ne’e, atu nune’e bele uza to’o tempu naruk.

Nia  husu mós ba Kompañia DACBER  atu termina sira nia obra ho di’ak no kualidade  tuir data ne’ebé previstu iha kontratu laran.

Jornalista        : Domingos Piedade Freitas

Editor              : Francisco Simões

HAKEREK NO HATÁN

Please enter your comment!
Please enter your name here