Vasina Sinovac, Imajen Tatoli/António Gonçalves.

DILI, 05 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 36, rekoperadu 25 no kazu ativu 925.

“Óbitu feto timoroan ida ho idade 17 ne’ebé hela iha Dili, diagnostikada ho Sindroma Insufisiénsia Respiratória Aguda (SIRA) tanba COVID-19 ka Cycle Thresehold E gene 30,7 iha HNGV iha 16 juñu 2021,’’ Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, segunda ne’e.

Notísia relevante:COVID-19: pozitivu 51, rekoperadu 33 no ativu 915

Iha loron ne’e kedan hala’o tratamentu iha Vera Cruz tuir protokolu ba COVID-19, inklui oksijenasaun liuhosi ventiladór.

Hafoin loron 18, pasiente la mellora, no loron 04  jullu iis-kotu iha tuku 16:50, tanba multiple organ failure no família koordena ona ho ekipa saúde no hala’o ona funerál tuir protokolu ne’ebé adopta iha Timor-Leste.

Kazu foun ohin hamutuk 36 maihosi Dili 24  no munisípiu-sira seluk  12, kompostu hosi mane 21 no feto 15.

Hosi totál kazu detetadu foun ohin, ho idade 12 mai karaik laiha, entre tinan 12-59 na’in 36 (100%), idade 60 mai karaik  laiha. Hosi kazu detetadu foun ohin  22,2% sintomátiku.

Kumulativu kazu konfirmadu sura hosi 21 marsu 2020 to’o 05 jullu 2021 hamutuk 9.512. Hosi horisehik mai ohin, teste ne’ebé Laboratóriu Nasionál Saúde halo hamutuk 441 PCR, ho detallu hanesan tuir-mai, Vijilánsia sentinela ualu, rastreiu ba kontaktu ka Contact tracing sia, Rastreiu Aleatóriu ka Random Screening 87, Viájen sai-hosi serka sanitária hosi Dili 315, Viájen internasionál 21, Follow up iha kuarentena ida.

Totál testes PCR ne’ebé halo horisehik 04 jullu iha Munisípiu-sira seluk, RAEOA no HNGV hamutuk 489 ho detalla hanesan tuir-mai, Maubisse 10, Maliana 10, Viqueque hitu, Suai 17, Baucau 112, Ermera haat, RAEOA  22  no HNGV 47.

Totál doze vasina ne’ebé fó ona ba populasaun elijível tinan 18 ba leten, to’o ohin dader tuku 10:00,  loron 05  jullu tuir sistema informasaun Sáude iha Ministériu Saúde,  totál  kumulativu 1ª doze iha Dili 114.926(53,8%), totál  kumulativu 2ª doze  iha Dili 14.367 (6,72%).

Ema ne’ebé simu ona vasina doze dahuluk iha Timor Leste 213.032 (28,2%)no simu ona doze daruak  26.180 (3,47%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 5,0/100 mil abitante, enkuantu ba de’it munisípiu Díli 10,5/100 mil abitante.

Insidénsia iha leten sei nafatin hatudu katak, munisípiu Dili mak fatin ho risku bo’ot liu atu populasaun hetan da’et no hada’et tutuan virus SARS-CoV-2.

Informasaun hosi izolamentu

Iha 05 jullu 2021, izolamentu Vera Cruz halo tratamentu ba kazu detetadu na’in 19, iha área obstetrisia na’in-ualu no iha medisina interna na’in-ualu, iha sirurjia na’in-tolu.

Iha obstetrisia na’in-ualu kategoria leve (mild ) hotu. Iha área medisina interna na’in-ualu. Ida grave oksijéniu na’in-rua, moderadu na’in-lima leve mild. Sira na’in-tolu iha sirurjia kategoria leve mild hotu.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Husu ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here