Pesoál Saúde prepara vasina Sinovac iha UNTL, tersa (29/06). Imajen Tatoli/Francisco Sony.

DILI, 04 jullu 2021 (TATOLI)–Sala situasaun, Sentru integradu Jestaun Krize (CIGC, sigla Portugés), rejista kazu pozitivu COVID-19 hamutuk 51, rekoperadu 33 no kazu ativu 915.

Notísia Relevante: COVID-19, pozitivu 64 no ativu 897

“Kazu foun ohin, hamutuk 51 hosi Dili na’in 35 no Munisípiu sira seluk 16, kompostu hosi mane 30 no feto 21,” Koodernadór Forsa-Tarefa ba Prevensaun no Mitigasaun, Rui Maria de Araújo hateten liuhosi nota ne’ebé Agéncia TATOLI, asesu Domingu ne’e.

Hosi totál ne’e, kazu detadu foun  ho idade 12 mai karaik 12 na’in ida,  entre 12-59 na’in 48 (94,1%), idade 60, na’in rua. Hosi kazu detetadu foun ohin,  7,8  % sintomátiku (hatudu sintoma).

Kazu konfirmadu kumulativu sura hosi 21 marsu 2020 to’o 04 jullu 2021  hamutuk 2021 9.476. Hosi horiseik mai ohin, teste PCR iha Laboratóriu Nasionál Saúde halo hamutuk  523 ho detalleu hanesan tuir mai, Vijilánsia sentinela hitu, rastreiu ba kontaktu (Contact tracing) 13, rastreiu Aleatóriu (Random Screening) 26, viajen sai husi serka sanitária Munisipiu Dili 439, viajen internasionál:4 no Follow up iha Kuarentena 34.

Totál teste PCR ne’ebé halo horiseik 03  jullu iha munisípiu sira seluk , REAOA no HNGV, hamutuk 292, ho detallu hanesan Baucau 118, Maliana 12, Maubisse:45; RAEOA 17,  Suai 17,  Viqueque 8, no HNGV 96.

Total doze vasina ne’ebé fó ona ba populasaun elijível tinan 18 ba leten,  to’o ohin dadeer 10:00, loron 04  jullu tuir Sistema Informasaun Sáude iha Ministériu Saúde,  totál komulativu doze dahuluk iha Dili 114,722 (53,7%).

Totál kumulativu doze daruak iha Dili 14,367 (6,72%) no ema ne’ebé simu vasina doze dahuluk iha Timor Leste 212,828 (28,2%) no simu ona doze daruak iha Timor Leste 26,156 (3,47%).

Atu bele hatene surtu ida ninia evolusaun, no mós surtu ne’e aumenta ka diminui, indikador ida-ne’ebé matenek-nain epidemiolojia nian uza maka insidénsia.

Konvensionalmente insidénsia sukat totál total kazu foun, kada loron, pur 100 mil abitante, no hatudu risku ne’ebé populasaun iha atu hetan da’et moras ida no hada’et  tutan SARS-CoV-2.

Grafika sira hatudu katak média (rata-rata) ohin, husi insidénsia COVID-19 iha Timor-Leste durante loron 7 ikus mak 4,8/100 mil abitante, enkuantu ba de’it Munisipiu Dili 10,0/100 mil abitante.

Iha semana ida-ne’e, insidénsia iha Munisipiu Dili nafatin aas-liu Munisipiu sira seluk, tuir kedas ho Munisipiu Baucau no Ermera. Ida-ne’e hatudu katak Munisipiu tolu ne’e mak iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 4 jullu 2021, izolamentu Vera Cruz halo tratamentu ba kazu detetadu na’in-18. Iha área obstetrisia na’in-hitu (7) no  iha medisina interna na’in-11, iha obstetrisia na’in-hitu (7) kategoria leve  (mild) hotu.

Enkuantu iha área medisina interna na’in-11 mak na’in-rua (2) grave, krítiku na’in-ida (1), uza ventilador na’inida (1),  uza oksijéniu na’in-rua (2) no moderadu na’in-hitu (7)  leve (mild).

Númeru kazu moderadu no grave ne’ebé baixa iha Vera Cruz hatudu katak, bainhira ema barak liu detetadu pozitivu, barak  liútan mak sei baixa ho kategoria moderadu no grave.

Nune’e, CIGC informa katak ema ne’ebé rekuperadu ona hosi moras COVID-19  no liu ona hosi izolamentu terapéutiku domisiliar (iha uma-rasik) ka iha fatin ne’ebé Estadu prepara, bainhira atu dezloka sai hosi ka tama ba serka sanitária, la presiza halo swab, maibé nafatin presiza hetan autorizasaun esepsionál hosi Diretór CIGC.

CIGC mós informa ba populasaun tomak katak ema-ne’ebé simu ona vasina doze daruak hasoru virus SARS-CoV-2, naran vasina ida hosi hirak ne’ebé rekoñesidu hosi Organizasaun Mundiál Saúde-bele ona sirkula livremente tama ka sai serka sanitária, no la presiza hetan autorizasaun esepsionál hosi Diretór Centro Integrado Gestão de Crises.

Bainhira sente moras isin-manas, mear, kakorok moras ka sintoma seluk tan bele ba konsulta iha Sentru Saúde ne’ebé besik, atu bele halo swab no sente katak sai kontaktu-besik ba ema ruma ne’ebé detetadu pozitivu ona, no seidauk hetan kontaktu husi ekipa konjunta saúde  bele liga ba numeru 119 atu organiza oin sá foti swab.

Aleinde ne’e, CIGC mós husu ba populasaun tomak, atu kontinua resepita no kumpre regra prevensaun no ijiéne individuál ne’ebé Governu hatuur ona atu prevene COVID-19.

Regra sira ne’e,  mak hanesan uza máskara,  fase liman beibeik ho sabaun ka dezinfetante ruma,  evita kose liman ba matan, inus ho ibun,  bainhira kumprimenta malu la presiza ka’er liman, bensa-liman, rei-malu ka haku’ak malu,  evita halibur malu barak, hamri’ik ka tur do’ok husi ema seluk, mínimu metru ida ho balun.

Jornalista : Florencio Miranda Ximenes

Editór       : Cancio Ximenes

HAKEREK NO HATÁN

Please enter your comment!
Please enter your name here