Komunidade iha Dili simu vasina Sinovac, tersa (29/06). Imajen Tatoli/Francisco Sony.

DILI, 02 jullu 2021 (TATOLI)—Komisaun Interministeriál ba Implementasaun Vasina COVID-19, fó-sai dadus katak, to’o ohin loron populasaun elijível  iha Timor-Leste (TL) ne’ebé simu ona vasina doze dahuluk, hamutuk 210.000 ne’ebé atinji ona 28%.

“To’o ohin, ema ne’ebé simu ona vasina doze dahuluk iha TL hamutuk 210.000 no atinji ona 28%  hahú hosi 07 abríl 2021. Hosi númeru ne’e 26.000 mak simu ona  vasina doze daruak,’’ Reprezentante Komisaun Interministeriál ba Implementasaun vasina COVID-19, Célia Gusmão, hateten liu hosi konferénsia imprensa, iha salaun MSSI, Caicoli, sesta ne’e.

Notísia relevante:Governu halo alterasaun substansiál ba sorteiu ‘Lotaria Vasina Kontra COVID-19’

Nia dehan, rezultadu hosi apoiu vasina ne’ebé Governu TL simu tán adisionál hosi Austrália, hamutuk doze 65.000, konsidera ajuda tebes Ministériu Saúde hodi oferese vasina iha territóriu tomak.

“Iha Dili vasina sei hala’o ba ema hotu-hotu ho tinan 18 ba leten. Iha munisípiu sira-seluk, doze dahuluk halo ona ba ema tinan 60 ba leten ho sira moras krónika, no doze daruak hala’o hela  ba profisionál saúde no liña oin-sira ne’ebé simu ona doze dahuluk iha fulan abríl,’’ nia hateten.

Iha munisípiu seluk rejista ema ne’ebé simu vasina hamutuk 97.447 ho 18 % hosi doze dahuluk no iha 11.806 (2%) ho doze daruak.

Bainhira kampaña vasinasaun kontinua, Governu apela ba ema hotu-hotu iha TL atu kontinua observa matadalan prevensaun-sira hodi hapara transmisaun COVID-19 no proteje sira ne’ebé seidauk bele simu vasina. 

Entretantu, to’o ohin loron sidadaun iha TL simu ona vasina COVID-19 ho totál doze 359.800, ne’ebé inklui  vasina AstraZeneca hosi Austrália hamutuk doze 135.000, vasina AstraZeneca hosi Covax Facility doze 124.800 no vasina Sinovac  hosi Xina doze 100.000.

Totál populasaun iha Timor-Leste bazeia ba dadus sensus uma-ka’in iha tinan 2015 hamutuk 1.183.643.

Jornalista: Felicidae Ximenes

Editór: Cipriano Colo

HAKEREK NO HATÁN

Please enter your comment!
Please enter your name here