Ministériu Saúde (MS) ho Organizasaun Mundiál Saúde (OMS) iha Timor-Leste (TL) fó formasaun ba pesoál sanitária ne’ebé sei halo promosaun no prevensaun ba inspesaun COVID-19 iha munisípiu Dili, iha salaun MS, kinta (01/07). Imajen Tatoli/Francisco Sony.

DILI, 01 jullu 2021 (TATOLI)—Ministériu Saúde (MS), serbisu hamutuk ho Organizasaun Mundiál Saúde (OMS) iha Timor-Leste (TL), hodi fó formasaun ba inspetór sanitária hamutuk 60 atu konvense komunidade iha Munisípiu Dili kona-bá prevensaun COVID-19.

Diretora Jerál Prestasaun Serbisu Saúde, Odete da Silva Viegas, hateten inspetór sanitária-sira tenki iha responsabilidade di’ak hodi asume kna’ar atu fó informasaun ba autoridade lokál-sira no komunidade.

Notísia relevante:COVID-19: óbitu ida, pozitivu 104 no ativu 839

Nia hatutan, prevensaun COVID-19 ne’e mós la’ós responsabiliza de’it hosi MS, maibé Ministériu hotu-hotu tenki kontribui ba susesu ne’e.

“Ita boot sira iha responsabilidsde boot tebes hodi tama to’o iha suku no aldeia inklui fatin hotu-hotu hanesan restaurante no fatin públiku-sira ne’ebé ema halibur-malu barak, husu atu sira kumpri regra prevensaun,” Odete da Silva Viegas, hateten iha serimónia abertura formasaun iha salaun MS, kinta ne’e.

Nune’e mós reprezentante OMS iha TL, Arvind Mathur, iha esperansa katak, ho formasaun ba inspetór na’in 60 ne’e bele ajuda di’ak liu tán hodi halo prevensaun ba COVID-19 iha Timor Leste.

Kona-bá destakamentu, reprezentante autoridade munisípiu Dili, António Moniz, hateten inspetór-sira sei hahú destaka atu halo sensibilizasaun kona-bá prevensaun COVID-19 iha postu administrativu haat ne’ebé pertense ba munisípiu Dili, la inklui postu administrativu Metinaro no Ataúro.

Komandante Operasaun Munisípiu Dili, Inspetór Xefe, Delfin da Silva, konsidera serbisu ida ne’e la’ós fásil, nune’e husu ba inspetór-sira atu  serbisu ho responsablidade no buka atu pasiénsia hodi konsola komunidade, atu bele hadook an hosi peste ne’e.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here