Diretór Ezekutivu FONGTIL, Daniel Santos do Carmo. Imajen Tatoli/Francisco Sony

DILI, 02 jullu 2021 (TATOLI)-Membru Forum ONG  Timor-Leste (FONGTIL) na’in-11, kinta horiseik (01/07), tuir formasaun instrumentu dijitál kona-ba nutrisaun no seguransa ai-han.

Notísia Relevante : FONGTIL rekomenda ba Estadu halo revogasaun ba PCIC

Diretór Ezekutivu FONGTIL, Daniel Santos do Carmo hateten, formasaun ne’e hala’o tanba hetan parseria hosi NGO internasionál CATALPA liuhosi asina nota entendimentu iha fulan Outubru 2020 atu serbisu Sosiedade Sivíl hamutuk hodi asegura nutrisaun no seguransa ai-han iha Timor-Leste.

“Formasaun uzu instrumentu dijitál ne’e hodi haforsa serbisu multi-sektorál iha área nutrisaun no importante tebes ba membru-sira hodi aprende no serbisu hamutuk ho Governu hodi atinje objetivu Dezenvolvimentu Sustentavel rua ba planu asaun konjunta nasionál seguransa ai-han no nutrisaun,” Daniel Santos do Carmo hateten liuhosi komunikadu imprensa ne’ebé Agência Tatoli asesu, sesta ne’e.

Nia dehan, importante hosi formasaun dijitál ba membru sira ne’e atu aprende tanba liga ba asuntu nutrisaun no seguransa ai-han, tenke uza didi’ak plataforma ne’e hodi fahe informasaun no atividade organizasaun nian ne’ebé kontribui ona ba nutrisaun no seguransa ai-han.

Nia dehan, rezultadu prinsipál hosi formasaun uzu instrumentu dijitál ne’e mak (hamutuk.tl) atu membru no rede ONG setoriál sira iha koñesimentu kona-ba oinsá uza instrumentu dijitál plataforma online hodi haforsa koordenasaun multi-setoriál hodi membru sira bele kontribui no hatene planu Governu hodi responde ba situasaun nutrisaun no seguransa ai-han iha Timor-Leste.

Pontu vokál Scaling Up Nutrition (SUN) Moviment, Filipe da Costa. Imajen TATOLI/Egas Cristóvão

Pontu vokál Scaling Up Nutrition (SUN) Moviment, Filipe da Costa hateten papél sosiedade sivíl mak tulun Governu hodi identifika prioridade sira ne’ebé di’ak ba povu, no apoiu Governu hodi ezekuta tuir programa no planu estratéjiku sira.

Nia aprezenta kona-ba Planu Asaun Konsolida Nasionál ba Seguransa Ai-han no Nutrisaun (CNAP-NFS sigla inglés) ba organizasaun neen membru FONGTIL nian, tanba planu asaun ida-ne’e inklui planu prioridade sira ba kada setór no estrutura rezultadu Komún, indikadór sira, no intervensaun prioritária ne’ebé aprezenta ona iha Konsellu Ministru iha loron 4 Novembru 2020.

Iha dokumentu CNAP-NFS atuál hatudu katak Timor-Leste menus nutrisaun rekorde 24.9% tanba han la turi padraun, no ai-han la seguru (moderadu) iha 36%, hosi dadus rua ne’e Governu no sosiedade sivíl serbisu maka’as atu atinji ita-nia alvu katak to’o 0% iha tinan 2030 tanba indikadór ba rezultadu komún to’o tinan 2030 mak redús raes-badak (Stunting) husi 47.1% ba ≤ 25.1%, redús isin-krekas (Wasting) hosi 8.6% ba ≤ 3%, todan liu (Overweight) ita redús ona hosi 1.5% ba 1.2% iha 2020.

Nia reafirma, iha relatóriu CNAP-FNS ne’e, sira simplifika área prioridade hosi 375 intervensaun iha área nutrisaun no seguransa ai-han ho kustu billaun $35.00, ba 18 prioridade ne’ebé liga ba asuntu saúde, agrikultura no peska, solidariedade sosiál no inkluzaun, edukasaun, juventude no dispostu, turizmu, negósiu no indústria, obras publika, igualdade no inkluzaun.

Planu Konsolida (CNAP-NFS) ne’e atu elabora kuadru rezultadu Komún-ida hodi harii forsa konjuntu atu hakotu forma oioin má nutrisaun no hamlaha zero iha Timor-Leste tuir planu estratéjiku dezenvolvimentu nasionál 2030 no objetivu dezenvolvimentu sustentavel rua ba erradika hamlaha.

Pontu vokál, Filipe da Costa mós aprezenta VIII Governu Konstitusionál lori Timor-Leste sai ona nasaun membru Movimentu Nutrisaun Estimulante (SUN Movement) nian ba dala-62, no país sira halo ona esforsu atu hadi’ak nutrisaun, no Timor-Leste lansa-nia membru iha loron 13 Outubru 2020.

“Ita harii ona sekretariadu-ida ba SUN Movement. Iha tinan ida-ne’e, sekretariadu sei partilla CNAF-NFS ba parte interesada sira, sosiedade sivíl, relijiozu ka relijioza sira no komunidade molok lori ba konsellu ministru hodi aprova no oinsá lori ba Ministériu Finansas hodi governu hahú investe. Tuirmai, fasilita diálogu nasionál kona-ba sistema ai-han, nutrisaun ba kreximentu, no koalizaun ba merenda eskolár,: Filipe da Costa tenik.

SUN Movement ne’ebé estabelese iha tinan 2010 ho vizaun atu forma dalan foun-ida ba servisu kolaborasaun entre nasaun membru sira hodi erradika má nutrisaun, no membru país sira lidera atu unifika parte hotu sai forsa koletivu-ida hodi hadi’ak nutrisaun iha idak-idak-nia país.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here