Kooedenadór Advokasia FONGTIL, Ivo Colimau Lay Costa. Imajen Tatoli/Francisco Sony

DILI, 01 jullu 2021 (TATOLI)-Forum ONG Timor-Leste (FONGTIL), rekomenda ba órgaun Estadu; ezekutivu (Governu) no lejizlativu (Parlamentu Nasionál) atu hadi’a ezisténsia papél Polísia Sientífika Investigasaun Kriminál (PCIC, sigla portugés).

Koordenadór Advokasia FONGTIL, Ivo Colimau Lay Costa, argumenta katak presiza hadi’a papél PCIC nian tanba bazeia ba FONGTIL ninia observasaun nota katak, ezisténsia PCIC hamosu konflitu interese entre PCIC ho Polísia Nasional Timor-Leste (PNTL) iha ezekusaun servisu seguransa interna, tanba abrigu ba artigu 6 hosi lei Orgánika PCIC hatudu katak, PCIC kuaze apodera kompeténsia servisu PNTL nian, ne’ebé impoin iha artigu 2-3 hosi Lei orgánika PNTL númeru 9/2009, 18 fevereiru.

Haree ba situasaun refere FONGTIL hanoin katak, órgaun ezekutivu ka Konsellu Ministru no órgaun Lejizlativu, komisaun B ne’ebé trata Asuntu Defeza, Seguransa no Negósiu Estranjeiru, presiza hadi’a situasaun atuál ne’ebé iha, liu-liu ezisténsia no papél PCIC iha país ida-ne’e, tanba abrigu ba artigu 147 hosi Konstituisaun RDTL no Lei seguransa nasionál númeru. 2/2010, 21 abríl, la konsidera PCIC nu’udar Instituisaun Seguransa iha Soberania Timor-Leste, PCIC konsidera hanesan produtu hosi Polísia Ministériu Justisa, ne’ebé hetan apresiasaun no aprovasaun hosi Konsellu Ministru iha loron 18 fevereiru 2014, liuhosi dekretu lei númeru, 15/2014, 14 maiu.

Liuhosi konferénsia imprensa iha salaun FONGTIL, Caicoli, Dili, segunda ne’e, Ivo Colimau Lay Costa, aprezenta FONGTIL hanoin katak, presiza halo revogasaun tanba abrigu ka faktu balun ne’ebé FONGTIL haree mak PCIC atua kazu agresaun fíziku ne’ebé ejerse hosi oan ba Aman, PCIC atua kazu Agresaun fíziku ne’ebé ezerse hosi aman ba oan, PCIC atua kazu krime violasaun sexual iha Ainaro, PCIC atua kazu falun an metin iha Santuáriu Ramelau, PCIC atua kazu Asidente Tráfiku iha Kuluhun ne’ebé hamate vítima Renato Viera de Araujo, kazu hirak iha leten, loloos kabe ba kompeténsia PNTL liuhosi diresaun Tránzitu maibé PCIC mak atende fali.

Ho Kazu hirak-ne’e konstituisaun RDTL, iha artigu 115 númeru 2 letra a, no númeru 3 fó biban ba órgaun ezekutivu hodi halo produtu lejizlativu maibé la signifika produtu ezekutivu ninia kualidade ka kapasidade boot liu fali orden konstituisaun.

“Ne’e ita haree fila-fali prinsípiu ierárkia lei ida ne’e, iha defisiénsia jurídiku, entaun konstituisaun bele halakon tiha dekretu lei númeru 15/2014 maiu kona-ba ezisténsia PCIC nian tanba PCIC ita konsidera la’ós instituisaun ne’ebé prinsipál liu ka ezijénsia liu atu bele fasilita Timor-Leste ninia ezijénsia intermu seguransa internal, tanba FONGTIL abrigu ba lei konstituisaun RDTL artigu 146 no 147 fó biban ba instituisaun rua hanesan F-FDTL no PNTL atu halo servisu ba defeza no seguransa, liuliu PNTL ninia baze legál mak artigu 147 hosi konstituisaun RDTL no ninia substansiál ne’e mai iha lei orgánika PNTL númeru 9/2009 18 fevereiru, ita hanoin agora daudaun ita la presiza PCIC, tanba papél ne’ebé PCIC halo Polísia Nasional Serbisu Investigasaun Kriminál (PNSIK) mós bele halo,” Ivo Colimau hateten.

PNTL-PNSIK konsege halo servisu investigasaun kriminál ho kualidade pezadu no eskluzivu, ne’ebé tuir loloos kabe ba PCIC ninia kompeténsia hanesan, PNSIK halo deskobrimentu no kapturasaun ba autór instalasaun liña internet ilegál, ne’ebé komete hosi operadór Elite Computer no Telemor, PNSIK halo deskobrimentu no kapturasaun ba autór distributor droga, PNSIK halo deskobrimentu no kapturasaun ba Diretór Jerál Terras Propriedade, kazu abuzu podér, Dano Agravadu, falsifikasaun dokumentu ka notasaun téknika, falsifikasaun agravadu no pasivu aktu ilísitu.

“Ita haree katak, PNSIK-PNTL iha kapasidade ne’ebé másimu hodi atua kualkér natureza krime iha país ida nee,” nia hateten.

FONGTIL rekomenda ba Konsellu Ministru halo revogasaun ba mandatu PCIC ne’ebé vigora iha dekretu lei númeru 15/2014, 14 maiu ka devolve PCIC nu’udar Instituisaun Polísia ne’ebé iha autoridade Ministériu Justisa, no konverte PCIC ba fali Unidade Científica Investigasaun Criminal UCIC ne’ebé abreviadu enkaixa UCIC ba iha Autoridade PNTL, espesialmente iha estrutura PNSIK, ho objetivu hodi fasilita investigasaun sientífika kriminál, hodi apoiu órgaun ka instituisaun jurídiku seluk, ne’ebé iha papél halo investigasaun hanesan, Ministériu Públiku, Comisão Anti Corupção (CAC) no Forensic Hospital Nacional Guido Valadares presiza koordenasaun hosi PNTL.

Relasiona notísia ne’e, Agência Tatoli tenta ba konfirma ho PCIC, maibé seidauk fó komentáriu tanba sei okupadu ho servisu.

Jornalista       : Arminda Fonseca

Editór             : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here