Primeiru-Ministru, Taur Matan Ruak prezide retiru ho membru Governu sira, iha Salaun Ministériu Finansa, Aitarak-Laran, segunda(03/08). Imajen Tatoli/Egas Cristovão

DILI, 03 agostu 2020 (TATOLI)–VIII Governu Konstitusionál iha segunda ne’e realiza retiru ba preparasaun jornada orsamentál tinan fiskal 2021.

Ministru Prezidénsia Konsellu Ministru, Fidelis Manuel Leite Magalhães, hateten reuniaun ho modelu retiru ne’e hala’o hodi partilla informasaun di’ak liután ba membru Governu sira hodi halo preparasaun di’ak ba jornada orsamentál 2021 ne’ebé sei hala’o iha aban, tersa (04/08).

“Governu realiza retiru ida ba membru Governu hotu hodi prepara di’ak liután ba jornada orsamentu. Aban dader sei hahú jornada orsamentu ba Orsamentu Jerál Estadu (OJE) 2021,” relata Ministru Fidelis hafoin ramata retiru iha salaun Ministériu Finansa (MF), Aitarak-Laran, segunda ne’e.

Portavóz Governu ne’e esplika, intensaun hosi retiru ne’e atu rona rekomendasaun preleminár hosi Komisaun Rekuperasaun Ekonómika nian.

“Sira hato’o rekomendasaun balun ba membru Governu sira atubele tetu no deskute hodi prepara ba jornada orsamentu ne’ebé sei ko’alia mós kona-ba prioridade ba Governu iha 2021,” nia subliña.

Rekomendasaun sira ne’e seidauk fó sai maibé aban mak se hato’o hosi komisaun.

”Governu rona iha diskusaun entre membru Governu sira kona-ba rekomendasaun sira ne’ebé mak hato’o no haree ona ba dook ninia implementasaun ne’ebé maka liña ministeriál sira tenke implementa hodi konkretiza prioridade sira,” nia akresenta.

Kona-ba prioridade ida pur ida, Komisaun Rekuperasaun Ekonómika sei hato’o relatóriu no Konsellu Ministru sei halo desizaun no aprovasaun ba rekomendasaun hirak ne’ebé sira submete.

Retiru ne’e rasik prezide hosi Primeiru-Ministru, Taur Matan Ruak no partisipa hosi membru Governu sira hotu hahú hosi Vise Primeiru-Ministru na’in-rua, Ministru, Vise-Ministru, no Sekretáriu Estadu sira.

Antes ne’e, Konsellu Ministru aprova medida kurtu prazu ba mitigasaun  impaktu sira hosi krize ekonómika nian, ne’ebé rezulta hosi surtu COVID-19 iha ámbitu Planu Rekuperasaun Ekonómika.

Medida hirak ne’e ninia objetivu prinsipál maka apoia hodi hatán ba sidadaun sira-nia nesesidade bázika, apoia traballadór sira iha setór informál, mantein postu traballu sira no rendimentu inklui mantein empreza sira iha merkadu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here