Diretór Ezekutivu FONGTIL, Daniel Santos do Carmo. Imajen TATOLI/Francisco Sony

DILI, 02 jullu 2021 (TATOLI)-Forum Organizasaun Naun Governamentál Timor-Leste (FONGTIL) fó apresiasaun ba Governu liuhosi Ministériu Saúde ne’ebé ho esforsu maka’as ikus mai taxa partisipasaun komunidade iha territóriu nasionál hahú sa’e.

Notísia Relevante : Membru FONGTIL tuir formasaun instrumentu dijitál

“Ami fó apresia ba Primeiru-Ministru VIII Governu Konstitusionál ne’ebé fó despaixu ba sosiedade sivíl hodi superviziona ka monitoriza implementasaun vasinasaun
iha munisípiu 12, inklui Rejiaun Administrativa Espesiál Oé-Cusse Ambeno (RAEOA), nune’e apresia tebes Ministériu Saúde ne’ebé ho esforsu maka’as ikus mai taxa partisipasaun komunidade iha territóriu nasionál ne’ebé simu ona vasina hamutuk ba etapa dahuluk nian hamutuk 210.000 ka sa’e 28%,” Daniel Santos do Carmo, informa liuhosi konferénsia  iha salaun FONGTIL, Caicoli, Dili, sesta ne’e.

FONGTIL mós fó apresiasaun ba responsavel Sentru Saúde sira iha territóriu nasionál ne’ebé kolabora ho FONGTIL nia membru-sira hodi fó informasaun kona-ba situasaun ne’ebé akontese iha prosesu vasinasaun ba populasaun no Servisu Autónomu Medikamentu Ekipamentu Saúde (SAMES) ne’ebé kolabora tebes ho FONGTIL hodi fó informasaun kona-ba servisu SAMES nian relasiona ho jestaun distribuisaun vasinasaun no fasilidade ne’ebé SAMES iha.

FONGTIL nia membru-sira ne’ebé halo monitorizasaun ba vasinasaun AstraZeneca no Sinovac iha terrenu nota katak iha Postu Administrativu Hatubuiliku, Munisípiu Ainaro, tuir monitorizasaun hosi NGO rádiu Mauloko Maubiese katak pesoál saúde sira, preparadu hela vasina maibé komunidade la ba simu vasina. Nune’e iha Munisípiu Viqueque, Sentru Saúde Osu komunidade 100 ida liu mak ho voluntáriu hakarak simu vasina, maibé vasina mak laiha.

“Iha Sentru Saúde Turiskai, Munisípiu Manufahi, tuir ita-nia monitorizasaun populasaun la ba simu vasinasaun ho
razaun ta’uk tanba informasaun ne’ebé públika kona-ba efeitu hosi vasinasaun no hosi parte seluk tanba agora koleta kafé no sira fó razaun katak sé ba vasina maka, vasina iha reasaun halo sira la ba ku’u kafé,” nia dehan.

Monitorizasaun iha Dili, deskobre iha katak doutór sira la halo tratamentu ba populasaun hodi hatene sira-nia istória moras, maibé ba rejistu koko de’it tensaun direita ba vasina. Situasaun ida ne’e iha semana liubá FONGTIL nia deskobrimentu rekomenda ona atu Ministériu Saúde atu fó atensaun tanba iha ne’e sei lori risku ba ema sira ne’ebé ho istória moras oi-oin.

“Maske ita-nia Saúde sira esplika katak sira ne’ebé iha moras króniku bele simu, maibé ita-nia komunidade barak mak la check-up tuituir entaun sira mós la hatene sira-nia moras ,ikus mai simu vasina bele akontese, fali moras foun hanesan, stroke, sira ne’e, tanba ne’e ami husu Ministériu Saúde tenke fó uluk tratamentu uluk ba komunidade ne’ebé hakarak simu vasina liu-liu idade 60 ba nune’e bainhira simu vasina karik labele akontese buat ruma,” nia dehan.

FONGTIL rekomenda ba Ministériu Saúde relasiona ho sitasaun vasina AstraZeneca nian ne’ebé daudaun ne’e akontese, halo ema mate maske sei iha prosesu investigasaun, maibé Ministériu Saúde tenke kontinua sensibiliza informasaun ba komunidade kona-ba vasina nia efeitu negativu sira ba populasaun hodi konvense populasaun atu kontinua hakat ba sentru saúde hodi simu vasinasaun, no kazu ruma akontese tenke ofisiálmente hato’o ba públiku nune’e labele perturba fali sidadaun sira seluk ne’ebé hakarak simu vasina.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here