Bee-matan Oe-Naek iha aldeia Maunaebeno. Imajen Tatoli/Abilio Elo Nini.

OÉ-CUSSE, 18 juñu 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hamutuk ho Sekretáriu Rejionál Agrikultura, no Sekretáriu Teras Propriedade enkoraja komunidade suku Cunha, aldeia Maunaebeno atu proteje no konserva bee-matan Oé-Naek

“Bee-matan ida-ne’e furak tebes. Ha’u mai husu imi dalarua ona, atu haree nia kondisaun tanba iha ne’e mesak ai-bobot haleu. Entaun, atu halo diak-liu no furak liu, ita hotu tenke proteje didi’ak, tanba aban bairua bele sai poténsia turizmu. Tanba, iha tempu bailoron bee-matan ne’e nafatin laiha mudansa. Entaun, ne’e signifika ita tenke proteje ka konserva hodi hadia halo di’ak liután,” Arsénio Paixão Bano hateten ba komunidade sira iha diálogu komunitáriu ho komunidade iha aldeia Maunaebeno, sesta ne’e

Prezidente autoridade husu ba komunidade aldeia Maunaebeno atu dezenvolve di’ak liután no prioritiza aktividade kultivasaun iha aldeia Maunabeno, tanba potensia bee-matan ne’e bele serví kuda produtu lokál no bele asesu ba merkadu

Entretantu Sekretáriu Rejionál Asuntu Agrikultura, José Eta, enkoraja komunidade atu konserva bee-matan tanba bee-matan hanesan nesesidade esensiál ba kriatura sira inklui biodiversidade

“Imi-nia aldeia furak no matak, maske iha tempu bailoron ita hare matak. Tanba ne’e, husu ba imi atu hasa’e tan kuda ai-oan barak tan atu konserva bee labele maran iha tempu oin mai, tanba bee-moos hanesan nesesidade esensiál ba kriatura sira inklui biodiversidade. Tanba ne’e, inan-aman sira hakarak ita-nia hela fatin, suku no aldeia sai furak no matak tenke hahú ona hapara tesi ai-arbiru, tau lutu haleu ita nia bee-matan, kuda ai-oan, nune’e bele konserva bee-matan sira ba ema hotu nia nesesidade,” Jose Eta hateten

Iha aldeia Maunaebeno, nia dehan, bee-matan tolu (3) mak seidauk konserva, tanba tuir observasaun animál sira-ne’e mós livre uza ona bee-matan sira-ne’e tanba komunidade la konserva hodi halo lutu haleu. 

“Presiza kolaborasaun entre parte autoridade lokál atu tau tara-bandu tradisionál ho Guvernu nian. Tanba bee-moos ne’e, ema hotu presiza ba nesesidade loro-loron nian,” nia dehan.

Autoridade RAEOA hala’o diálogu komunitariu ho komunidade iha aldeia Maunaebeno, suku Cunha. Imajen Tatoli/Abilio Elo Nini.

Iha parte seluk, Xefe aldeia Maunaebeno, Jeronimo Lafo Colo agradese ba autoridade tanba fó hanoin nafatin ba komunidade atu kria unidade iha suku no aldeia, atu hadi’a bee-matan sira ba interese komun. Nia husu ba teras propriedade atu halo levantamentu kadastrál ba sira-nia kintal iha bee-matan Oé-Naek atu sai fatin públiku ba interese komun

“Ha’u reprezenta komunidade sira, ohin ami hamutuk iha fatin ne’e, ami hakarak autoridade ajuda ami atu mai sukat ami-nia kintal sira, atu nune’e autoridade lokál ho autoridade tau tara bandu ona nomós halo lutu haleu bee-matan sira-ne’e. Ami apoiu tanba bee-moos ne’e la’ós ba ema ida maibe ema hotu atu presiza. Se ohin, ita hahú konserva sei fó benefísiu ba tinan 10 mai, ba oan no bei-oan sira-nia moris,” nia hateten.

Bee-matan Oé-naek lokaliza suku Cunha, aldeia Maunaebeno ho rai ektare ualu (8), benefisiáriu ba bee-matan Oé-Naek uma kain 420 no abitante 1827, totál bee-matan iha aldeia Maunaebeno hamutuk (3) mak hanesan bee-matan Oé-naek, bee-matan Oé-Luakan no bee-matan Petun Oé-Ana.

Jornalista: Abilio Elo Nini

Editór: Cancio Ximenes

HAKEREK NO HATÁN

Please enter your comment!
Please enter your name here