TDD. Imajen Tatoli /Dok

DILI, 25 juñu 2021 (TATOLI)—Tribunál Distritál Dili (TDD), halo re-julgamentu ba prosesu sivíl ne’ebé reklama hosi Mari Bim Amude Alkatiri, nu’udar autór hasoru Lourdes Menezes (reu) kona-bá kazu disputa rai.

Parte autór liu hosi advogadu Júlio Cardoso halo reklamasaun bazeia ba lei númeru 13/2017 artigu 3, hateten katak, direitu anteriór  ko’alia kona-bá ema ne’ebé ka’er sertifikadu Hak Guna Bangunan  (HGB) hosi tempu Indonézia to’o agora, iha direitu na’in ba rai  ne’ebé nia okupa.

Notísia relevante:TDD adia julgamentu ba kazu fraúde fiskál

Autór iha baze dokumentu legál kompletu dezde tempu portugés to’o tempu Indonézia, ne’ebé konsidera área disputa entre autór ho reu maizoumenus rai  ho metru kuadradu 1.500,  ne’ebé lokaliza iha aldeia Metin 3, suku Madohi, postu administrativu Dom Aleixo, munisípiu Dili, pertense ba autór.

Maski nune’e, iha prosesu judisiál ne’ebé la’o, Tribunál primeira instánsia antes ne’e absolve  prosesu ne’e no parte reu  mak manan.

Parte autór la simu desizaun,  nune’e halo rekursu  ba Tribunál Rekursu (TR),  konkorda hodi halo fila-fali re-julgamentu ba prosesu ne’e no TR rasik sei  dúvida ho rai ne’e ninia superfísie hodi husu atu halo inspesaun fila-fali.

Nune’e iha  prosesu re-julgamentu ne’e, Tribunál koletivu  solisita sei haruka karta hodi konfirma  ba iha Diresaun Nasionál Terras no Propriedade (DNTP) kona-bá parsela rai ho ninia lokalizasaun ba disputa rai ne’e.

Liuhosi audiénsia ne’e, Mari Alkatiri, hateten antes ne’e ko’alia ho parte reu maibé la simu-malu nune’e  iha 2009 halo reklamasaun ba iha justisa hodi deside.

Nia dehan, rai ne’e pretense ba sira-nia parte ho dokumentu kompletu desde 1978 no to’o momentu iha reklamasaun ne’e, foin haree uma fahi luhan ida mak harii hela.

Enkuantu, Lourdes Menezes hela iha rai ne’e  desde iha 1978, maibé laiha dokumentu ruma kona-bá rai no foin rejistu iha tempu independénsia.

Hafoin rona deklarasaun ne’e, Tribunál deside adia fila-fali julgamentu ne’e ba 09 jullu tinan ne’e, tuku 16:00 otl.

Julgamentu ba prosesu sivíl ne’e prezide hosi juiz koletivu Edite Palmira, Ivan Suritai, no juiza na’in-ida tan, parte reu reprezenta hosi advogadu privadu Octavio Cardoso no parte autór reprezenta hosi advogadu privadu Júlio Cardoso.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here