Médiku-sira kontinua halo atendimentu swab teste ba komunidade ne’ebé hakarak fila ba munisípiu, kuarte (30/6/21). Imajen Tatoli/António Gonçalves.

DILI, 30 juñu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 104, rekoperadu 54 no kazu ativu 839.

“Óbitu feto Timoroan ida ho idade 60, hela iha Comoro, Dili, diagnóstikadu Sindroma Insufisiénsia Respiratória Aguda (SIRA), tanba COVID-19 Cycle Thresehold N2gene 30,5, E gene 28,6, iha HNGV, iha 29 Juñu, tuku 14:00,’’ Koordenadór Forsa-Tarrefa ba Prevensaun no Mitigasaun, Rui Maria de Araújo, hateten liuhosi komunikadu, tersa ne’e.

Notísia relevante:COVID-19: óbitu bebé ida, pozitivu 63 no ativu 790

Matebian iha istória moras seluk hanesan diabetes, kankru iha intestinu ne’ebé naklekar ona mós ba pulmaun.

Hafoin transfere ba Vera Cruz, matebian hetan tratamentu ba SIRA, tuir protokolu ne’ebé iha, maibé iha tuku 17:00, matebian ii’s-kotu. Familia koordena ona ho ekipa saúde atu hala’o funerál tuir protokolu ne’ebé adopta iha Timor-Leste (TL).

SIJK informa mós ba púbilku katak, óbitu bebé fulan hitu ne’ebé relata horisehik, 29 Juñu, la’ós hela iha suku Bahamori, postu administrativu Venilale, Baucau, maibé hela iha Audian, Dili.

“Ami husu deskulpa ba lapsu ida-ne’e,” Rui Maria de Araújo husu deskulpa.

Kazu foun ohin 104 hosi Dili 28, Ermera 60  no munisípiu-sira seluk 21, ne’ebé kompostu hosi mane 74 feto 30.

Hosi totál kazu detetadu foun ohin, ho idade 12 mai karaik  laiha, entre tinan 12-59 na’in 98 (86,9%), idade 60 mai karaik  na’in-neen no 1,9% sintomátiku.

Kumulativu kazu konfirmadu sura hosi 21 marsu 2020 to’o 30 juñu 2021 hamutuk 9.222. Hosi horisehik mai ohin, teste ne’ebé Laboratóriu Nasionál Saúde halo hamutuk 797 PCR, ho detallu hanesan tuir-mai, Vijilánsia sentinela lima, rastreiu ba kontaktu ka Contact tracing 125, Rastreiu Aleatóriu ka Random Screening 58, Viájen sai-hosi serka sanitária hosi Dili 556, Viájen internasionál 33, Follow up iha kuarentena 20.

Totál testes PCR ne’ebé halo horisehik 30 juñu iha Munisípiu-sira seluk, RAEOA no HNGV hamutuk 355 ho detalla hanesan tuir-mai, Maubisse 20, Maliana 33, Viqueque 14, Suai 18, Baucau 129, Ermera 26, RAEOA 53 no HNGV 62.

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 4,1/100 mil abitante, enkuantu ba de’it munisípiu Díli 8,3/100 mil abitante.

Insidénsia iha leten sei nafatin hatudu katak, Munisípiu Dili mak fatin ho risku bo’ot liu atu populasaun hetan da’et no hada’et tutan virus SARS-CoV-2.

Informasaun hosi izolamentu

Iha 30 juñu 2021, izolamentu Vera Cruz halo tratamentu ba kazu detetadu na’in 14, iha área obstetrisia na’in-tolu no iha medisina interna na’in 11. Iha obstetrisia na’in-tolu kategoria leve (mild) hotu. Iha área medisina interna na’in 11. Tolu  grave, kritiku ida, uza ventiladór  nain-rua uza oksijéniu na’in-ida moderadu  na’in-hitu leve mild.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Husu ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here