Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (23/06). Imajen TATOLI/Egas Cristóvão

DILI, 23 juñu 2021 (TATOLI)—Governu liuhosi reuniaun Konsellu Ministu (KM) iha kuarta ne’e, delibera hodi propoin ba Prezidente Repúblika, Francisco Guterres ‘Lú Olo’, renova Estadu Emerjénsia (EE) ba dala-XV, loron 30 tan. 

Deliberasaun ne’e hafoin rona aprezentasaun pontu situasaun epidemiolójika nasionál hosi Sala Situasaun, Sentru Integradu Jestaun Krize (CIGC, sigla portugés).

“Governu propoin Prezidente Repúblika renova Estadu Emerjénsia atu permite suspensaun no restrisaun direitu no garantia fundamentál balun,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kuarta ne’e.

Notísia relevante: Prezidente Repúblika dekreta Estadu Emerjénsia ba dala-XIV

EE durante ne’e fó biban ba Governu atende evolusaun situasaun epidemiolójika no proliferasaun kazu rejistadu kontájiu COVID-19, ho hanoin atu evita no neutraliza risku propagasaun vírus, nune’e bele proteje saúde públika no iha kapasidade resposta ba Sistema Nasionál Saúde.

Antes ne’e, Xefe Estadu dekreta EE ba dala-XIV ba loron 30, hahú hosi tuku 00:00 iha kuarta (02 juñu) no sei termina iha tuku 23:59 iha kinta (01 jullu).

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here