Xefe suku Holsa, António Santa Cruz. Imajen Tatoli/Sérgio da Cruz.

BOBONARO, 30 juñu 2021 (TATOLI)—Xefe suku Holsa, postu administrativu Maliana, munisípiu Bobonaro, António Santa Cruz seidauk simu motór hosi Govenu.

Antes ne’e Governu halo ona distribuisaun motór verza ba Xefe suku hamutuk 451 iha territóriu nasionál, no Governu entrega de’it motór revo roda tolu ho númeru matríkula 9814G  ba António Santa Cruz, ne’ebé to’o oras-ne’e paradu iha administrasaun munisípiu Bobonaro no hein substituisaun.

Notísia relevante:DNTT Bobonaro presija transporte operasionál

António Santa Cruz, hateten suku Holsa hetan motór revo roda tolu hosi Governu tanba konsidera xefe suku ho kondisaun fízika defisiente.

“Iha momentu distribuisaun ha’u rezeita kedan tanba motór ne’e la kondíz ho área Jeográfika suku Holsa,” nia hateten ba jornalista Agência Tatoli iha sede suku Holsa, kuarta ne’e.

Maski xefe suku ne’e labele kondúz motór, maibé nia prefere liu motór verza, tanba bele buka ajudante hodi lori nia hala’o serbisu iha suku laran, inklui partisipa atividade-sira iha munisípiu Bobonaro no nasionál.

Preokupasaun ne’e hato’o ona ba Ministériu Administrasaun Estatál (MAE), maibé to’o agora Xefe suku ne’e seidauk iha resposta.

“Ha’u haruka ona karta ba nasionál, ha’u mós ko’alia ona ho Diretór Jerál Dezenvolvimentu Rurál, maibé seidauk iha informasaun-ruma,” nia hatutan.

Desde 2019, autoridade lokál ne’e hala’o serbisu uza de’it transporte espesiál (ojek), maibé durante tinan rua halo atendimentu ba populasaun la’o ho di’ak.

António Santa Cruz eleitu hanesan Xefe suku Holsa ba periúdu dala tolu, iha 2004, 2009 no 2016 ho totál populasaun iha suku ne’e hamutuk 7.967, mane 3.929 no feto 4.038, hosi Xefe família 1.802, no iha aldeia neen mak hanesan Solugolo, Bilicou, Oplegul, Lolo’oa, Secar no Taz.

Jornalista: Sérgio da Cruz

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here