Edifísiu DNTT munisípiu Bobonaro, segunda (28/06/21). Imajen Tatoli/ Sérgio da Cruz.

BOBONARO, 28 juñu 2021 (TATOLI)—Diresaun Nasionál Transporte Terrestre (DNTT) munisipál Bobonaro, presija transporte atu hala’o serbisu, liuliu apoiu kontrolu no manutensaun ba sinais estrada ne’ebé kondisaun ladiak iha kapitál munisípiu no postu administrativu-sira.

“Ami presija transporte atu halo serbisu, uluk karreta ho motór iha, maibé tama hotu ona ba lelaun to’o agora Governu seidauk halo substituisaun. Situasaun ne’e difikulta tebes ami-nia serbisu iha terrenu,” Diretór DNTT Bobonaro, José Paulo Heriques Baptista hateten ba jornalista Agência Tatoli, iha kna’ar fatin, Soso, Maliana, segunda ne’e.

Notísia relevante:PNTL Bobonaro halo apreensaun ba motór 247

José Paulo Heriques Baptista hatutan, situasaun ne’e obriga funsionáriu-sira halo esforsu ba apoia atividade kontrolu no manutensaun ba sinais estrada utiliza de’it transporte privada.

Iha trimestre dahuluk, janeiru to’o maiu 2021, DNTT Bobonaro hatama ona reseita ba konfre Estadu hamutuk $23.434.

Orsamentu ne’e mai hosi serbisu administrasaun hanesan, inspesaun, produsaun karta kondusaun, lisensa trajetu, no rejistu veíkulu foun.

Antes pandemia COVID-19, trimestre dahuluk DNTT Bobonaro hatama reseita to’o $40.000, no durante situasaun Estadu emerjénsia funsionáriu-sira tenke serbisu turnu tanba movimentasaun transporte mós menus.

Totál funsionáriu iha DNTT Bobonaro hamutuk na’in 11, na’in-neen permanente no na’in-lima  kontratadu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here