Xefe Suku Caraubalu, João Pinto. Imajen Tatoli/Vitorino Lopes da Costa

VIQUEQUE, 30 juñu 2021 (TATOLI)-Autoridade lokál Suku Cauraubalu, Postu Administrativu Viqueque Vila, Munisípiu Viqueque, iha ona planu atu organiza membru Grupu Arte Marsiál (GAM) atu halo limpeza jerál iha suku laran.

Notísia Relevante : Idózus no invalidés 406 iha Caraubalu simu ona subsídiu

Organizasaun Arte Marsiál ne’ebé eziste iha Viqueque atualmente iha haat, maka hanesan Persaudaraan Setia Hati Terate (PSHT), Ikatan Keluarga Silat Putera Timor-Leste (IKS-PTL), Kmanek Oan Rai Klaran (KORK) no arte rituál Sete-Sete (77).

“Iha loron 29 ha’u hetan konvite hosi administradór postu Viqueque Vila, ita iha orsamentu uitoan hosi Ministériu Administrasaun Estatál (MAE) hodi fahe ba suku 10, iha postu Viqueque Villa ne’ebé kada suku  sei hetan $4.500 hodi implementa projetu limpeza jerál iha suku laran. Tanba ne’e,  ha’u planu hakarak organiza membru GAM sira hodi envolve iha limpeza jerál ne’e,” Xefe Suku  Caraubalu, João Pinto, informa ba Agênsia Tatoli, iha Caraubalu, kuarta ne’e.

Autoridade suku ne’e hatutan, limpeza ne’e sei presiza ema hamutuk na’in-20 maka servisu, maibé xefe suku no xefe aldeia sira sei tur hamutuk mak foin deside fatin limpeza nian.

Suku Caraubalu iha abitante kuaze 10.000-resin no aldeia hitu (7), joven barak kria bei-beik instabilidade tanba ne’e autoridade planu hodi sira servisu konjuntu hodi hatudu ezemplu no kria amizade entre membru GAM sira.

  Hahú konstrusaun Uma Kbiit-Laek

Xefe Suku Caraubalu, João Pinto, informa mós katak semana  oin, sei hahú konstrusaun ba  programa Uma Kbiit-Laek (UKL) ba ema kbiit-laek iha Aldeia Cabira-Oan.

“Programa uma  kbi’ik la’ek foin ne’e, iha suku Caraubalu nian dada sorteiu monu iha aldeia Cabira-Oan sei halo ba benefisiáriu na’in-tolu,” João Pinto informa.

Ba uma kvbiit-laek iha Suku Caraubalu ho tipu uma oin rua; 4x8m2 no tipu  3×7 m2 .  Tipu  4x8m2  tanba benefisiáriu  família uma laran barak, entaun  hetan   uma  tipu boot.

Jornalista : Vitorino Lopes da Costa

Editór      : Francisco Simões

HAKEREK NO HATÁN

Please enter your comment!
Please enter your name here