Idózus no invalidéz iha Suku Caraubalu, Postu Administrativu Viqueque Vila, Munisípiu Viqueque, simu subsídiu, kuarta (30/06/2021). Imajen Tatoli/Vitorino Lopes da Costa

VIQUEQUE, 30 juñu 2021 (TATOLI)-Idózus no invalidés hamutuk 406 iha Suku Caraubalu, Postu Administrativu Viqueque Vila, Munisípiu Viqueque, simu ona subsídiu idózus no invalidés hosi Governu.

“Prosesu pagamentu ba benefisiáriu idózus iha ha’u-nia suku, hahú tersa to’o kuarta ne’e termina ona ho di’ak tebes. pagamentu ne’e hala’o diretamente hosi Banku Nasionál Komersiu Timor-Leste (BNCTL, sigla portugés),” Xefe Suku Caraubalu João Pinto  informa ba Agência Tatoli, iha Suku Caraubalu, Viqueque, kuarta ne’e.

Benefisiáriu-sira ne’ebé iha ona ATM diretamente ba foti iha estasaun ATM BNCTL nian, maibé hirak ne’ebé  seidauk trata ATM maka BNCTL selu diretamente.

“Ami-nia preokupasaun ida mak to’o agora ami-nia benefisiáriu balun seidauk simu nian diretu, maske dadus ami haruka ba Ministériu Solidariedade Sosiál no Inkluzaun, naran iha lista mai suku ne’e iha, maibé osan laiha,” nia afirma.

João Pinto sujere ba MSSI tau atensaun ba idózus sira ne’ebé rekorrente ba sai benefisiáriu até balun tinan rua osan seidauk sai, tanba ne’e Governu presiza tau atensaun másima ba preokupasaun populasaun sira-nian ne’e.

Pasiénsia hodi hein prosesu

Responde ba preokupasaun sira ne’ebé aprezenta hosi Xefe Suku Caraubalu nian,  Diretór Sentru Solidariedade Sosiál no Inkluzaun Munisípiu Viqueque, Geraldo de Carvalho, husu ba idózus pendente  na’in-780 no inválidu na’in-728 nafatin ho pasiénsia hodi hein direitu hosi Governu.

“Imi-nia direitu sei la lakon, problema prosesu mak nune’e. Tan ne’e, ha’u ba benefisiáriu sira ne’ebé osan la sai ne’e pasiénsia hodi hein,” Geraldo de Carvalho hateten.

Geraldo hatutan, sentru MSSI  Viqueque sei kontinua esforsu hodi halo prosesu ba naran ne’ebé laiha no naran ne’ebé mak iha maibé osan la tama iha konta bankária.

Pagamentu ba benefisiáriu idózus sira hahú ona iha loron 23 juñu 2021 sei remata iha 20 agostu 2021  ba faze dahuluk nian, agora daudaun BNCTL halo pagamentu direta ba  suku hodi besik liu ba benefisiáriu sira.

Jornalista       : Vitorino Lopes da Costa
Editór             : Franciso Simões

HAKEREK NO HATÁN

Please enter your comment!
Please enter your name here